○三年第一日開工，教育統籌局局長李國章去灣仔胡忠大廈啱啱拆咗教育署招牌嘅教統局辦事處巡視，順便見吓記者；佢致辭時話，將教統局同教署嘅英文簡稱EMB同ED加埋一齊，就係Embed，即係穩固地放入去，唔能夠分開咁解。
不過，局署合併之後，李國章同羅范椒芬就會分開坐，李局長坐喺中環，羅秘書長就喺灣仔坐鎮，坐番喺兩年半前佢坐過嘅教署署長辦公室，佢話好開心，以後返屋企都近啲。
至於做咗大約半年教署署長嘅李慶煇，趁住局署合併之際退休，佢喺茶會上講教署歷史，話香港開埠之初，有啲村落已經有私塾，一八四八年政府喺維多利亞城、赤柱同香港仔，揀咗三間學校資助，政府每間學校每個月畀十蚊；李國章即刻搭訕：「我𠵱家都想！」
（圖）教統局同教署合併之後第一日運作，局長李國章（左）同常任秘書長齊齊切蛋糕慶祝。
傳真︰2623-9278
電郵︰