喺美國一星期賣過40萬嘅XBOX遊戲《SplinterCell》，行貨版延遲咗成半個月，終於會喺明日到香港，代理重喺同日搞首賣會，地點分別係灣仔188商場DreamStore同銅鑼灣XBOXProShop，屆時會有精美T-Shirt同紀念品送畀首賣會嘅玩家，有興趣不妨去趁吓熱鬧，呢隻連《MetalGear》生父小島秀夫都讚嘅大作，廠方定價只係賣$298，內容就同美版一樣都以英文做介面，雖然隻Game都會有電腦版同PS2版，但電腦版系統要求鬼死咁高，PS2版重要成幾個月後先出，而且重係冇XBOX版咁靚，所以未有機嘅不妨諗吓連機一齊買埋！
好多人都知GBA機金、銀兩色，有九成貨都係由我哋嘅祖國生產，不過你又知唔知𠵱家銀色嘅GAMECUBE主機原來都係MadeinChina，由祖國生產，而且銀色主機喺日本賣價重貴過原色成4%-5%，真係唔好以為祖國生產就CheapCheap。
另外，繼美國同日本之後，香港行貨主機亦轉咗做39×××型號，亦即代表上一代主機板正式退役，現今新型號基本上同之前一樣，專業整機師傅就話好多零件都整合咗，所以散熱好咗咁話，大家可以放心煲機喇！
數數手指《DevilMayCry2》原來喺年廿九推出，撞正農曆新年假期（今年因為初二係星期日，所以年廿九已經開始放農曆年假），雖然話就話年初二都有Game舖開門做生意，但冇理由拜年都走去買Game㗎，所以據代理透露，今次行貨會提早推出，訂咗Game嘅讀者真係要CheckCheck係訂咗行貨定水貨，費事到時個個新年有Game玩，自己冇得玩就濕滯，遊戲攻略就會繼續《GameWatch》製作。
KOEI隻《真‧三國無雙》話咁快就出到第三集，有上次《猛將傳》炒貴過定價成百幾蚊嘅經驗，相信醒目嘅今次都會訂定啦，遊戲會喺2月27日推出，定價6800日圓，大約港幣$450。