港股2003年首個交易日，紅盤高收9365，升44點，成交僅21.36億元。傳統講法，紅盤高收就會全年行好運，係一個好兆頭。不過，紅盤高收未必等如港股今年一定造好，兩者基本上無必然關係。
中電信（728）近期都唔知發生乜事，早前已因為大幅調高中港IDD接駁費而遭朱總點名批評，近期又因推出針對移動網絡變相單向收費優惠而被圍攻。
雖然信產部力撐中電信，不過計委即時出信話，短期內唔會畀固網調整收費，就算要調整收費，亦會從有利於提高內地電訊市場盈利及競爭力嘅角度來決定收費調整。這意味中電信固網收費，將受到中央很大限制。中電信與中央嘅衝突似乎愈來愈大，呢一劑真係相當麻煩。
華人置業（127）主席劉鑾鴻私人投資嘅科鑄（2302），在淡市中公開發售有10倍超購，都可算唔簡單。
阿虎問黑客此股炒唔炒得起？佢話今次係全部發行新股，冇股東減持，而新股總數只得5500萬股，公眾市值只得5115萬元，細細粒容易炒，據聞幕後炒家表明會力撐。不過有一點要注意，由於此股股權分散，當主要股東禁售期屆滿後就可能有麻煩，因此只宜短炒不宜長期持有。
恒發（097）私有化失敗，早在各大行預期之內，恒地（012）即時話已經唔能夠再增持，重話中煤（003）好難維持盈利增長及派息，結果中煤尾段受壓，跌0.5%，收報10.05元。恒發今日復牌，隨時會跌回5.90元水平。至於中煤後市會否被質，就真係好難講。
阿虎