天氣雖然凍，但入得場睇波嘅球迷相信亦唔會介意。有好波欣賞，又點少得啤酒助興，雖然球場入面嘅啤酒賣到二十蚊一杯，但亦有唔少球迷幫襯呢班滿場飛嘅啤酒女郎。
天文台噚日下午四點幾發出寒冷天氣警告，唔知係咪咁嘅原因，噚日觀眾人數唔夠第一日多，大約只有五成入座率。觀眾人數下跌除咗天氣影響，相信亦同戲碼有關係，始終香港人鍾意名牌效應，第一日有施莉絲比賽，當然受歡迎啲啦。
一年一度嘅女子網球挑戰賽，次次都吸引好多世界級選手來港，而每逢呢個時刻，就係推廣網球活動嘅最好機會。香港網球總會今年喺球場外嘅攤位，特別擺一部網球遊戲機俾小朋友玩，用呢種方法推廣，都算幾有創意。