喺快將舉行嘅美國底特律車展上，各大車廠都會展出旗下最新車款，當中除包括有早前曾作介紹嘅平治SL600旗艦級跑車外，寶馬亦會展出Facelifted新版嘅3系Coupe及Convertible，同埋配用一台全新3.0柴油引擎嘅330CdCoupe轎跑車，相信勢必惹來不少車迷注視。
雖然3系房車版及旅行車版，已率先響2001年推出Facelifted新版，但將於今年推出嘅新版3系Coupe及Convertible，卻明顯來得甚具跑味；當中全新設計嘅車頭泵把，配以經改良嘅頭燈及鬼面罩，最能令新車增添有一份高性能跑車風采。尾燈則改用更光亮嘅LED燈配搭，而尾泵把除同屬新設計外，兩款型號更會同時配有泊車感應器㖭！至於車廂布局方面，則仍以跑車化設計為主，加上承托力十足嘅座椅，乘坐倍覺貼服舒適。
同時，廠方更會為選擇330i、325iCoupe及Convertible嘅用家，提供有一台全新嘅6前速SSG(SportsSequentialGearbox)波箱作選擇；而全新330Cd，更會配用一台全新3.0公升嘅柴油引擎，除有強勁動力輸出外，而且重有低耗油量嘅特性㖭！有興趣嘅車迷，就要留意佢哋在港嘅推出日期喇！