響2001年初，某大專線小巴營辦商率先以兩部，配用符合Euro3環保條例柴油Turbo引擎嘅平治Sprinter小巴服務市民大眾，深受好評；但響講求環保嘅趨勢下，平治代理又瞬即運來一部，改以石油氣作驅動燃料嘅Sprinter小巴。雖然兩者外觀上沒有多大分別，但勝在有力又環保，加上高頂式車廂設計所帶來嘅闊落空間，同埋約40萬嘅車價，話唔定日後會成為各大小巴營辦商或乘客「追捧」嘅對象呢！
記者：鄭達基
攝影：陳偉林
車輛提供：仁孚行商用車部（28957248）
置於車頭嘅一台2295cc直4引擎，除改以石油氣作驅動燃料外，動力輸出依然強勁（馬力143ps/5000rpm，而扭力則為21.9kgm/3200-4700rpm），配以一套傳統5前速手波，起步加速反應敏捷，而且運轉亦見寧靜㖭！同時，此車除備有四輪碟式制動外，而且重有ABS及ASR等電子系統輔助，從而可予人有收放自如之感呢！
與先前抵港嘅Sprinter公共小巴一樣，呢部石油氣版本同屬高頂設計，不但能為乘客帶來闊落嘅空間感外，配合承托力極高嘅座椅，同埋車頂多個冷氣送風口，亦可營造出一個舒適愜意嘅乘車環境；另外，闊大摺合式車門及低地台設計，乘客上落亦見方便得多呢！而用上房車化鋪排嘅駕駛艙，設備配搭實用性甚高之餘，座席重備有多段式調校，以切合不同駕駛人士需要；就連車尾嘅對開式太平門，亦方便乘客於緊急時，能於短時間內離開車廂呢！