前晚元旦日有好多場英超英甲波都因為落大雨，場地去水唔切，所以要改期或者腰斬。賽後總有啲白走一趟嘅球迷發火，而查爾頓領隊古比士利都為遠道而嚟嘅球迷感到可惜。我求大俠覺得有啲嘢唔應該完全從球迷角度設想，始終落場比賽嘅係球員，面對危險嘅又係佢哋，係唔踢得就無得勉強。
好似李斯特城對雷丁場波半場腰斬，兩隊領隊不知幾惡，話比賽應該繼續，我求大俠睇番電訊話半場之後積水問題的確愈嚟愈嚴重，腰斬係啱。講開又講，紐卡素就成為濕地戰嘅得益者，因為利物浦完全唔適合踢呢家波。有捱眼瞓睇呢場波嘅睇見班球員險象環生，都唔會安樂。
我求大俠響早幾日先彈完上一輪英超整體戰況沉悶、入球少，無計，大家都體諒球員拼到殘晒。可能因為係元旦日，各球隊唔想擁躉失望，加上踢完就可稍事歇息，所以前晚個個都好搏，整體戰況亦激烈，由頭鬥到尾。好似曼聯、阿仙奴、愛華頓同埋修咸頓幾場波都響下半場末段至掀起高潮。如果睇波無捱到完場可能錯過好多精采入球。
對於呢輪元旦日比賽，我求大俠真係講到欲罷不能，淨係睇愛華頓對曼城場「中國人打吡戰」就令中國人熱血沸騰。李鐵踢得唔錯，有助攻；孫繼海就更踢到不知幾生猛，當選比賽最佳球員實至名歸。賽後曼城領隊基瑾大讚孫、李係中國最好波嘅兩個球員，好有水準。聽到基瑾咁講，我求大俠個心都有一陣暖意。
曼聯響元旦日險勝新特蘭，贏波輸盤，捧場客唔嬲就假。無睇比賽嘅實鬧曼聯無用，但有睇延播嘅應該知道唔係曼聯踢得差（成場大概有三十次攻門），只係新特蘭龍門馬曹上晒身，左撲右撲都唔知救出幾多個險球啫。我求大俠敢講佢算係元旦日之星。印象中佢習慣遇強愈強，弊在對弱旅就唔多掂，如果呢吓嘢改善到就一定有前途。
利物浦前鋒迪奧夫真係唔生性，上次對阿仙奴已經爭射十二碼，前晚對紐卡素重衰，有球波因為不滿球證判決，掟個波落地終於食咗面黃牌。紅軍已經響低谷，領隊侯利亞前晚已經放件小朋友美拿落場踢後備，迪奧夫重唔改善態度莫講話難爭正選，隨時成為另一個美查。美查係邊個？當年加盟紅軍後無咩波踢位仁兄囉。