某年，一向吃牛肉皮膚會敏感的我，明知故犯的吃生牛肉，結果生到一身生牛肉色的紅印，其後紅印變灰，見自己一身天氣唔好的顏色，好想撼頭埋牆，但亦想起某有臭狐的舊情人說過，太陽能醫臭孤，只要攤開胳肋底在陽光下曬一個下午，就整個夏季都唔臭，如此心諗，大家都是皮膚的事，也許曬太陽會有幫助，就黑布蒙頭曬它個七日七夜，到甩完皮，白底、唔襟黑的我，嘩，灰印拜拜，白番晒。而黑布蒙頭，因為會生雀斑，雀斑當然cute，惟我塊面仔比較賤格，雀斑過一排就會散，散開的雀斑cute鬼。
講開皮膚的事，化妝品是女孩子的恩物，但，化妝品就是藥，也是癮，愈塗愈濃，所以一向㩒住自己搽粉底，以雪花膏代之，怕回頭太難。
雪花膏好有粉底效果，面仔白如雪，但有時限，往往食完餐飯就失效，打回原形，就此請教過一位化妝師女朋友，她說進食令身體轉熱，皮膚產生氧化，所以如此。化妝師還畀貼士：「熱底的人，或多汗、油性膚質的，用抗氧化的粉底比較適合；用淺兩度的粉底亦可，到氧化之後，顏色就自會tune番好。」
（編按：康妮續稿未到，暫停一天。）
容雅慧