問責制面世轉眼就半年，局長手下嘅常任秘書長一直異常低調，佢哋其實肩負重大任務，就係要保護局長，唔好畀人有藉口叫佢老闆落台。
馬時亨、李國章、何志平等幾位新人局長，或多或少都撞過板，輔助佢哋嘅常秘唔想再出事，當然要金睛火眼昅實。試過有常秘同新人局長拍晒心口，話有事佢嚟孭鑊，必要時更可以調佢走。
但最勇都係經濟發展及勞工局局長葉澍堃，毋須出動常秘，自己赤膊上陣，同立法會啲議員講開失業問題時，半開玩笑咁周圍叫大家手下留情，千祈咪郁啲就叫佢「下台」。
議員何俊仁同八方講，葉局長經歷老到，處事圓滑又識講笑，不過講到失業問題就好硬淨，堅持大環境氣候佢好難控制，唔應該入晒佢數，何俊仁重話因為真係論責任，關鍵都係阿松嘅把關嘅經濟政策。
傳真︰2623-9278
電郵︰