內地「價格殺手」國美電器分店噚日開幕，邀請八方同一班行家去深圳睇熱鬧。八方勢估唔到電器舖都會咁墟冚，排隊畀錢嘅人龍亦相當長。
國美高層同八方講，前晚七點已經有人排隊，噚日清晨五點開幕前，門口就聚集咗幾千人。
國美噚日慶祝成立十六周年同深圳第二家分店開幕，特別以超特價賣家電慶祝，LG四十三吋投射大電視唔使七千蚊人民幣，部份空調一千蚊人民幣有找，手機每部二百九十九蚊人民幣起。
舊年十一月本報都報道過深圳有間百貨公司以「買一百元送五十元」促銷，吸引幾十萬人排隊，場面失控到要出動公安維持秩序，差啲釀成騷亂，所以噚日呢單只係小兒科。
國美高層又話，計劃春節前喺皇崗開多一間分店，吸引埋港人北上入貨，重可能直接來港開舖。唔知呢種萬人空巷嘅場面會唔會喺香港出現？
（圖）深圳國美電器分店噚日開幕，人頭湧湧，八方幾乎俾人群迫到唞唔到氣。
傳真︰2623-9278
電郵︰