昨日同大家披露過將會於2003年抵港嘅歐洲新車後，今日就同大家一齊睇吓日本同韓國各大車廠，響今年會有甚麼新車到港；其中，最矚目非於今個月初正式抵港發售嘅三菱Colt跟日產Fairlady莫屬，皆因新車除造型吸引外，車廂及機械配搭亦令人對其留有深刻印象。另外，現代Getz、新版凌志RX300等車亦不能忽視；睇嚟2003年嘅香港車壇，定必多姿多采呢！
記者：Mark哥
話時話，今年第一款抵港嘅新車，相信非全新Colt莫屬；呢款由平治協助設計嘅細車，賣點認真多籮籮，包括有全新開發嘅MIVEC引擎，其中1.3公升版最大馬力為98匹、最大扭力13.5kgm，配合INVECSⅢ無段變速自動波箱，性能表現倍見出色，就連車廂亦有十種顏色供用家選擇；車價方面，如果代理可以造到11萬樓下嘅話，亞Mark一定睇好佢㗎！遲吓重有新版FamilyLook嘅Pajero、年底前全新SpaceWagon亦會出爐，今勻用2.4公升MIVEC新偈，其性能用家毋庸置疑。
將會成為今年第一款到港嘅日產車系，勢必會係走高性能跑車路線嘅FairladyZ，雖然之前已有水貨車行引入，但行貨相信亦會響二月正式抵港；代理聲稱新車將會以自動波版作主打，馬力高達280匹。當然，呢類跑車未必可以掀起熱潮，但就可以提高品牌形象呢！
剛於1月1日由皇冠車行接任香港代理權嘅大發汽車，雖然早前傳聞新代理未必會再引入本土版型號，惟近期亞Mark收到風，話新代理會延續引入大發本土版車款嘅策略，除Copen之外，全新MoveAeroDown嘅Turbo版同Mira，遲吓亦會陸續抵港，以大發K-Car嘅強勁陣容，加埋豐田Echo同Corolla嘅市場佔有率，你話中、小型汽車Market，佢哋係咪銳不可當呢！
今年最主要嘅新車款，勢必係全新Accord；到港會係北美版型號，外形與日版及歐洲版略有不同，但底盤設計則一樣。動力配搭方面，就會有2.4同3.0V6兩種選擇，但根據上一代嘅銷售表現睇嚟，響同級車中突圍並非易事，還看代理推銷嘅伎倆喇！至於日本版Accord頂級嘅Euro-R型號，相信就要靠水貨商引入喇！
另外，Jazz會否引入1.5公升型號，就要睇原有1.3公升版本嘅持久力喇！既然賣得的話，又使乜用1.5公升偈作招徠吖！係咪？
一直被視為黑馬嘅韓國車，近年表現突飛猛進，當中現代汽車更以Trajet同SantaFe，打入備受追捧嘅MPV同SUV市場，亦有不錯嘅銷售紀錄；而新一年佢哋又會以Getz問鼎迷你CityCar市場，相信新車會響農曆年前後跟車迷見面，聽聞車價重非常吸引㖭！
不少傳媒經已披露過有關資料嘅新款豐田Harrier，意味着凌志RX300亦會轉款在即；外形同現有型號稍有不同，引擎仍然以3.0公升為主，但就會加入VVT-i技術，但估計新車最快都要9月至可以抵港發售。
講多無謂，萬事得今年首款抵港新車，相信會係一直受到外界注視、並配備新一代轉子引擎嘅RX-8跑車，雖然代理臨時取消美國試車之旅，但外界評價不俗；喺香港代理極力爭取下，新車預計會響第二季初抵港。呢款超級跑車馬力最少都有250匹，兼且重有加減半自動波，亞Mark估計車價會響40萬上落。
另外，要注意嘅重有Mazda3（即係323嘅新款），新車會同Mazda2及Mazda6類似，都採用近似家族面譜及車廂設計；至於Mazda6，一直有傳2.3公升同Wagon版本到港，亞Mark相信會喺三、四月左右可以實現。
份屬韓國現代姊妹車廠嘅起亞（Kia），響投放大量資源及人力後，國內及海外銷售數字持續攀升，繼去年底前代理引入全新Carens七人車，以唔使11萬嘅車價作招徠，備受矚目外，全新Sorento大型SUV，有着酷似凌志RX300嘅賣相，加上唔到20萬嘅定價，當今年第一季正式抵港時，相信勢必又會掀起一場四驅車風潮呢！
今年重點當然係新版ImprezaWRX，雖然話係Facelifted版，但外形就有好大分別，頂級版STi甚至會有動力上嘅增強。車價方面，聽代理講話遲吓嚟嘅全部都係頂級型號，所以售價會略為調升。至於近年備受追捧嘅Forester，亦推出咗On-road高性能嘅CrossSports型號，惟代理至今未有考慮引入；至於全新Legacy車系，相信今年下半年會正式曝光呢！
向以主攻年輕人K-Car市場嘅鈴木汽車，繼去年運嚟全新MRWagon同仿古味甚濃嘅Lapin之後，今年1月上旬代理又會引入Facelifted新版嘅KeiWorks，造型跑意盎然之餘，重有齊Recaro桶椅，前後碟式制動、LSD限滑差速器、15吋合金胎軨等裝備，遲吓重有Jimny同GrandVitara新版到港，係Fans嘅你就要留意喇！
豐田代理剛運嚟Facelifted新版嘅EchoVerso之後，嚟緊1月下旬佢哋又會推出新款Prado四驅SUV，相信會係出口澳洲版本嘅模樣，雖然設備未必至豪，但就勝在可靠耐用兼具有全天候性能；其次，今年最有機會抵港，重有用以抗衡Stream嘅全新Wish中型MPV，至於備受車迷注目嘅EchoRSTurbo小跑車，或許就要留意水貨車行嘅到貨日期喇！