馬主H家人過年前在馬會沙田會所旺灣樓擺酒宴客，賓主盡歡。其中一位親戚嘅親戚對馬主H講：「前一排我一個同事結婚，喺呢度擺酒，覺得啲服務幾曳，啲夥計猛咁分餸，分完未等我哋食晒碟菜就拎走，好似餵鴨仔趕收工咁，但今晚完全唔同噃，食物一流，招呼又好，簡直冇得頂，好過晒外面啲酒店，點解會有咁大轉變？」
馬主H唔知以前發生過乜嘢事，只能夠講：「或者有一點唔同，我哋家人好唔鍾意夥計分餸，所以一早同會所嘅餐飲經理講明，其實講咗三四次，講完又講，就係侍應上菜後，除咗魚翅、糖水，其餘一概唔使分餸，要放低響度，等人客慢慢享用，至於上菜速度，就維持正常，唔需要人客食完一碟至上第二碟，咁樣，人客就冇咗現時酒樓酒店飲宴嘅通病——令人客有壓迫感，兼且避免晒侍應飛碟！」
估唔到改一改，就會有咁好效果，人客食得慢，慢就有機會欣賞啲菜式，試真啲味道，唔係被迫吞落去；另外，慢慢食，少吃者淺嚐即已，大胃王食多幾小碟，於是人人滿意，唔使返屋企再食公仔麫。呢招其實好簡單，但要餐飲部合作，樓面喼頓合作至得。馬主H事先與旺灣樓有充份溝通，難得負責人從善如流，全面配合，於是收到相當好效果，一啲人客重叫馬主H寫信去馬會讚揚啲辦事人員㖭。