今個月五號，無綫會舉行《十大勁歌金曲頒獎典禮》，而網上賭博公司「易勝博」（網址：
男歌手方面，「易勝博」嘅賠率總括都幾合理，熱到爆嘅當然係李克勤同周杰倫，賠率同樣係一賠二點五，次熱係同為一賠三點五嘅許志安同陳奕迅，陳小春就以一賠五做大熱阿三，反而《勁爆》頒獎禮嘅大贏家劉德華只係半熱，賠率係一賠六點五。而今年冇乜宣傳嘅謝霆鋒就一賠九，但人氣勁升嘅Shine竟離奇到二十四強都唔入，最冷嘅就係EO2，賠率係一賠二百五十。
而女歌手最熱係一賠二點五嘅陳慧琳，次熱係一賠三嘅盧巧音，跟住就係一賠三點五嘅鄭秀文（Sammi）。梁詠琪同容祖兒分別佔熱門嘅第四同第五位，最奇嘅係喺前幾日新城舉辦嘅勁爆頒獎禮攞勁爆女歌手獎嘅楊千嬅一賠六，竟然五強不入得第六，而最冷女歌手就係一賠一百一十嘅趙頌茹。
至於無綫嘅官方男、女歌手五強走勢，截至噚日為止，男歌手係李克勤、周杰倫、陳奕迅、許志安同劉德華，而女歌手就係容祖兒、陳慧琳、楊千嬅、鄭秀文同Twins。
名模Rosemary噚日喺慈雲山中心幫迪士尼主辦嘅活動行catwalk，Rosemary重扮公主，佢都好認真㗎，戴咗二十幾萬私伙首飾去襯套公主衫，佢話咁先似公主喎！問到佢除夕點過，佢話：「我同細佬同埋佢啲朋友過。」咁男朋友Gordan呢？佢話：「我同佢見得五分鐘咋，大家都要做嘢。」
趙薇上年平安夜玩得好開心，佢同吳大維俾雜誌拍到喺上海親暱嘅相。佢哋當晚喺上海明星蒲點「官邸」同一班朋友慶祝，趙薇有少少醉，重同吳大維喺舞池度跳貼身舞。佢哋可能喺「官邸」玩唔夠，所以就去咗公園談心，情到濃時重熱吻㖭，好溫馨咁，兩人嘅關係應該唔止朋友咁簡單。
陳文媛（BoBo）噚日去旺角新世紀廣場，出席「陳文媛活力『型』鞋Show」嘅活動，BoBo重同現場嘅fans大玩遊戲。BoBo話佢遲啲會去泰國拍戲，不過會同邊個合作就唔講得，但係就唔需要拍親熱戲。BoBo又話就算去到泰國都唔會睇「真人show」，因為佢覺得啲表演內容好核突喎！
容祖兒（Joey）前晚去咗澳門出席「全城樂繽紛除夕倒數嘉年華」，首次喺澳門過大除夕嘅Joey，因為大會安排佢坐直升機做交通工具，令佢覺得好威水。當演出完之後，Joey重即刻返香港同Twins一齊去唱卡拉OK，何超瓊重喺澳門捧Joey場。
汪明荃（阿姐）噚日喺尖沙嘴同大約一百名影迷，慶祝「明荃之友會」成立二十五周年。問阿姐有乜嘢新年願望，佢話：「希望新一年我會有好嘅演出。我遲啲會做粵劇同舞台劇《蝴蝶夫人》。」阿姐話下個月演出《蝴蝶夫人》時，會着和服同跳舞，佢話：「宣傳年曆卡上面有一套和服係我七一年喺日本買嘅，件和服有好多蝴蝶。以前我做電視劇《秋瑾》時都着過，所以好有紀念價值，都算係古董。」
