郭富城（城城）前晚在奧海城出席「郭富城飛越2003倒數大派對」，對於在部份已舉行的頒獎禮中食白果，城城看來並不介意。
城城說：「我舊年少產啫，唔代表乜嘢，我今年嘅工作都排得好密，有兩個廣告同一啲演唱會。」提到城城失意於《新城勁爆頒獎禮2002》及港台「第二十五屆十大中文歌曲優秀流行歌手大獎」時，他說：「我冇唔高興，自己到咗另一境界，攞獎係隨緣，我唔會宣布唔攞獎，獎項係鼓勵，我做嘢唔係為攞獎。」
城城亦批評四台音樂頒獎禮的機制不一，他說：「咁會令我同公司無所適從，電台對所有歌手應該平衡啲。」至於新人麥浚龍歌迷罵劉德華「老餅王」一事，城城則說：「我覺得樂壇應該百花齊放，新舊歌手都要互相有空間。」
採訪、攝影：陳梅香