早排因喺比賽時蓄意侵犯對手，搞到俾西班牙足總罰停賽四場嘅馬略卡前鋒伊圖，真係「世界仔」一名，竟然諗到出錢請班球迷睇波，以平息佢哋嘅怒火。
伊圖呢位喀麥隆前鋒，喺上月馬略卡主場對巴塞隆拿嘅聯賽，因蓄意踢對手莫達，結果踢咗三十分鐘就俾球證逐出場。馬略卡最後輸○比四畀巴塞，而伊圖本人亦俾西足總罰停賽四場。可能伊圖驚自己成為咗球迷嘅公敵，日前竟然話為表歉意，自己攞三萬歐元（約二十四萬港紙）請球迷睇馬略卡嘅主場比賽。
伊圖咁話：「我好後悔自己嘅所作所為，而我更係罪有應得。為咗表示我嘅歉意，我會買三萬蚊歐元嘅波飛，之後再請球迷入辛莫斯球場（馬略卡主場）睇波。」𠵱家歐洲啲球場暴力咁嚴重，球員踢得唔好或做錯少少嘢，就隨時成為咗球迷嘅沙包。伊圖肯攞咁大舊錢出嚟，無非都係唔想自己喺馬略卡球迷有個負面形象，費事日後又乜嘢麻煩。
但講開又講，伊圖佢季初試過用頭撞華倫西亞嘅安古路，搞到坐咗四場波監，𠵱家又重蹈覆轍，睇嚟佢真係要好好改善一下佢場內嘅紀律。
英國報章有報道話富咸會長阿法耶茲，諗住響噚晚對西布朗嘅聯賽之後，就請法國籍領隊泰簡拿食「豉椒炒魷」。我求大俠就認為富咸嘅中興、泰簡拿都出過唔少力，阿法耶茲咪咁忘恩負義好喎，而且個天都好似想留住泰簡拿咁，連場大雨令到場波改期踢唔成！不過，富咸近績唔多掂，泰簡拿捱到幾時實難料。
所謂「機會係要自己爭取」，效力帕爾馬嘅阿祖安奴就好明白呢個道理。佢今屆嘅表現有目共睹，所以佢亦好唔怕醜咁向祖雲達斯同羅馬推銷自己。或者有人覺得佢心頭太高，事關就算俾佢踢到祖雲達斯或羅馬，頂多踢後備，但係「人望高處」，阿祖安奴咁積極為自己嘅前途努力，真係值得學習。
前國足成員謝暉𠵱家雖然重未有班落，但話想重新入選由阿里漢領導嘅中國國家隊。無錯，謝暉係有實力，不過成大半年冇踢波，肯定冇十足體力同狀態，咁就話想返國家隊，似乎有啲癡人說夢話。如果佢重想踢國家隊，就唔好掛住四周圍傾生意，應該落力啲搵間球會，之後再操番弗，咁先至有用嘅！
球員轉會市場喺禮拜三重開，好似曼聯同阿仙奴咁都諗住執番一兩件以增強實力，但係利物浦領隊侯利亞就偏偏唱反調，咬牙切齒咁話唔會簽人。我求大俠就覺得侯利亞吹水，佢班波之前喺聯賽「九不勝」，反映隊波好有問題，如果佢唔簽番一兩個新兵，睇怕利記都幾難喺下半季成功翻身。