《蘋果》馬經嘅馬評家高智能喺○二年新春佳節期間，曾經貼中咗條四百萬三T，當時成為城中佳話，估唔到喺○二年嘅最後一日，本報又創紀錄，六合彩版嘅小德揀靚碼專欄，貼中當晚六合彩二獎，中五個半字。
《蘋果》讀者如照跟買複式八個號碼，一百四十蚊本錢就贏接近九萬蚊。《蘋果》馬經同六合彩版喺○二年可謂好頭好尾。
八方噚日特登去搵小德，問吓佢點解咁犀利。小德姓鍾，三十幾歲，係普通男人一個，但一講到六合彩就眉飛色舞，佢話自己讀緊書嗰陣已經醉心研究六合彩，至今次次都有落注，頭獎未中過，但二獎就中過幾次。佢喺《蘋果》九五年開檔時，已為六合彩版執筆，堪稱本報嘅「六合彩神」。
講到揀號碼心得，小德話最緊要跟紅頂白，揀一啲最近開過嘅號碼，避咗一啲成十幾二十期冇出現嘅冧巴，佢話六合彩都係賭博一種，好邪㗎，有啲號碼一唔開就會停好多期，相反有啲號碼就旺到你唔信。重有，唔好揀一啲四、五個連續一齊嘅姊妹號碼，例如1、2、3、4、5咁。
至於今次貼中二獎，小德當然有買，但就估唔到二獎派彩只得萬九蚊咁少，不過佢好開心咁多《蘋果》讀者跟住買中獎，可謂皆大歡喜。今晚又有六合彩攪珠，小德喺C16六合彩版又有心水好介紹，大家不妨參考吓。
傳真︰2623-9278
電郵︰