名攝影家水禾田為嘉皇臺拍咗輯攝影集，雖然以物業做背景，但仍保持一貫嘅柔和意態，運用光與影，完成有自我風格又冇硬銷樓盤成份嘅作品。如下圖嘅一幅相咁，係咪好似美國迪士尼嘅童話堡壘呢？實情係嘉皇臺嘅頂部，係水禾田最鍾意嘅一幅嚟㗎！全輯相都不過見到物業嘅一鱗半爪，令蘭西諗起王家衛嘅電影「花樣年華」，乜都得一角。
水禾田用咗七個早上同一個黃昏拍咗呢輯相，裏面嘅文字都係出自佢嘅手筆。嘉華地產喺寄畀嘉皇臺嘅客戶，好似醫生、馬會會員等專業人士宣傳郵件中，就印埋福幼基金會嘅募捐表格，捐款超過三百蚊，就可免費得到呢本攝影集。初步印咗兩千本。
福幼基金會嘅成立，係因為93年華東大水災，香港演藝界發起「減災扶貧」大行動，之後由其中十名成員組成嘅，水禾田係基金會嘅董事局成員。
蘭西噚日去大角嘴港灣豪庭，由門口去到現樓示範單位，同埋去睇嘉年華，條路都幾長㗎，重要左轉右轉。發展商恒基就好細心，喺每個主要位置都安排人手，引導客人點去，啲保安重好好禮貌，逢人講歡迎，走時又講多謝光臨，令蘭西有大豪客嘅感覺。
間保安公司叫宏力保安，值得稱讚。若果香港所有公司都有咁好態度，旅遊業就有救嘞。
過去兩年同代理合作無間，成功賣樓套現嘅九龍倉，噚日就頒咗十幾個獎畀五間代理行，以作鼓勵。中原就威晒，係總冠軍。中記噚晚借擎天半島售樓處搞慶功宴，但見中原一姐劉瑛琳（圖二左二）唔多開心，細問下，話說九倉黃光耀（圖二右三）答應佢，如果中原攞到總冠軍，就會送支十五公升紅酒佢哋慶功，點知黃生話訂唔到，只送支九公升香檳。一姐話點都會追佢畀番支紅酒為止。
噚日係03年嘅開始，大家都會有新年大計或願望，但對於利嘉閣董事總經理何紹章（Ivan）嚟講，就多一重意義，因為佢係一月一號出世，所以每年呢日都可以多個生日願望！
利記十六名高層，周一晚率先喺金鐘采蝶軒同Ivan慶祝生日，Ivan重帶埋太座出席，同事送咗隻金羊畀佢。平時大家都咁忙，難得有個機會可以聚埋一齊輕鬆一番，重可以聯絡吓感情㖭。
地產代理監管局最新年報話，為提高發牌工作效率，方便從業員履行各項規定，會分階段進行發牌電子化，又向持牌人發出身份證，作為統一識別。
蘭西聽代理講，地監局發信要求佢哋續牌時要影相做證件，指定要幫趁快圖美，聽講重要將代理個人資料存檔，據講係用電盈嘅管理系統。有啲代理就質疑，地監局咁做有冇得到私隱專員公署批准。
重有就係呢套存檔系統有冇經過投標程序先至批畀電盈呢？而存檔又有乜作用呢？
蘭西
電郵地址：