趙飛雲2003年有個好開始，噚日入馬場跟《蘋果》貼士買「萬事好」旗開得勝，在此亦謹祝各位讀者今年萬事好。
港股衰家食尾胡，除夕半日市終於回升48點，收9321，但較2002年收市價11397，就大跌2076點，跌幅18.2%。趙飛雲舊年炒股總算順風順水，希望今年表現勝舊年，與讀者齊齊贏。
睇番假期外圍美股表現，杜指兩日升咗38點，照數計就濕濕碎，不過除夕夜在先跌90點嘅情況下，拗腰回升9點則表現相當不俗，反映8250水平有支持力，不過亦唔排除只係櫥窗粉飾，仍要睇埋今晚走勢才可以講美股是否有轉機。
今日港股頗大機會承接美股升勢紅盤高開，但趙飛雲基本上仍係睇淡後市，估計恒指就算向上完全填補02年12月27日下跌裂口9426至9362，亦不易升破短期降軌阻力9442及10日線9528。今日若見恒指升近9450附近受阻回頭，趙飛雲會補回恒指Put輪9556，以升破10日線作止蝕位，博恒指只有小反彈，回頭向下填補10月15日上升裂口9131至8900，或更低水平。不過，穩陣計今日最多先買一半貨，因為要防美股今晚會繼續上升。
假前提過長實（001）可能係最先反彈嘅大藍籌，除夕半日市港股反彈主要由長實帶動，長實升1.9%，收50.75元。長實短期52至53.50元阻力相當大，若升近受阻，可伺機追入Put輪。
趙飛雲