新年新希望，小初謹祝大家今年炒股逢買必中。
小初年尾睇報紙統計，八吓舊年升幅最大同埋跌幅最大嘅股份，其中星光集團（403）原來舊年升咗138%，雖然隻股升幅厲害，但小初知道大炒家根本未散到貨。
星光2002年最後半個交易日嘅收市價係0.465元，相比10月份最低位0.29元，就可知隻股近呢兩個月升得有幾勁。隻股早排公布中期業績，盈利大升61.7%同埋有息派，當然係股價上升原因，但有炒家入市炒高至係主要原因。
經紀陳話，據聞市場上有位年輕炒家，唔知點解特別鍾意星光，多年來對佢照顧周到，而舊年就特別落力，可能佢收到風隻股盤數靚。不過，雖然佢落力推介隻股，又不斷將股價踢高，但可能年尾市況實在太差，投資氣氛薄弱，始終派唔到貨。
經紀陳又話，佢估星光股價高處未算高，如果唔貪心，分分鐘有機會坐一轉順風車。
慕容小初