轉眼間，香港已衰足5年，通常一個大循環為期約7年，即係最遲2004年才會有起色，雖然03年重未好得番，但應該唔會再差，起碼係見底盤旋，積聚復甦動力之局。大致而言，香港最黑暗時期應已過去，但今年金融市場波動仍大，投資仍要小心。
大市今次調整，雖已回落逾千點，但同芬佬傾開，佢話呢一輪有幾個外資大芬做咗唔少淡倉，平均在9600至9700點水平，估計佢哋會再推低個市先「食胡」。因此，9000點未必可守得住，去年10月10日低位8772點係好友最後防線，若然跌穿9000點，在8800至9000之間，好淡爭持會好激烈。
美國會否再減息，避免陷入通縮，令人關注。有分析家預言聯儲局會再減多0.25厘，估計低息期仍會維持多半年時間，03年主流投資策略仍是穩健的收息股，即使二三線高息股（唔少係工業股），預期亦可受惠未來的經濟復甦，既可收息，亦有機會賺價，係可優先選取對象。國企股普遍已度過低潮，平均息口有3至5厘，亦可財息兼收。
今年大市會在低位整固，基本上應是上落市，恒指在9000至12000之間上落，跌穿9000點機會不是沒有，但在9000點之下的時間，相信不會太長。若能把握到升跌的步韻，藍籌股每一個小浪，由低位起計算會有3至4成，亦可作為投資對象。
滙豐控股（005）收購美國HouseholdInternational預期首季完成，料大量發行的新股會對股價造成壓力，即使大市由低位回升，其升幅亦會受制，估計未來一年，滙控股價會在80元至95元間上落，適宜低位吸納作長線投資，但非博反彈的理想對象。
今年對和黃（013）係重要一年，3G推出若能為市場受落，和黃現時偏低的股價，勢會出現大幅反彈，估計有機會重見7字頭，若有機會在45元水平吸入，其預期升幅可逾5成，係博反彈較佳選擇。若電訊業生機再現，中移動（941）和聯通（762）亦會受惠。
郭兆誠