潮流興資源增值，電腦產品都唔例外，一部機最好有齊幾樣Funtion先叫抵買。今日介紹PRACTICAL呢部三合一MP3機仔，除可播放MP3同WMA格式歌曲外，重可以機頂嘅Mic孔，收錄現場聲音，作為訪問、會議記錄用途就至啱，透過內置嘅128MB記憶卡，更可收錄約32首MP3歌曲，去足一日街都夠聽。電源方便只使用一粒3A筆芯電，已可連續錄音十小時。外形設計不算太搶眼，不過勝在夠輕夠的骰，機前之USB插頭更可直駁電腦抄歌，十足十大熱嘅記憶手指咁。唯一缺點係不設任何記憶卡擴充槽，去旅行想錄定多啲歌都唔得。
記者：徐影龍
TopUniversal
查詢電話：26121121
Plasma等離子大電視價錢不斷滑落，似乎開始逐步滲入普通家庭，要擁有再唔係夢想，雖然Plasma的確又靚又慳位，兼且低輻射，不過始終存在一個極大缺點，就係不設RF輸入插頭，即係唔可以直駁大廈天線睇電視，所以市面已推出多款供Plasma使用嘅TV-Box，不過論質素就只算一般。天揚呢款「視聽王」真正支援1,024×768解像度，並非像其他產品般「倍」線，影像自然更細緻清晰，最煞食當然係對應雙語麗音，加上設有各式影音接駁裝置，駁PS2、錄影機或DVD機都冇問題，就算細細間房用LCD嘅電腦用家都咁啱使。
記者：徐影龍
康藝科技
地址：深水埗高登商場1樓91號舖
電話：23079084