番禺因有番山，禺山而得名，或曰番山之隅。兩年前撤市建區，納入廣州市，不久地鐵將直達市橋鎮。珠江三角洲物阜民豐，魚米之鄉，飲食文化非常獨特，食得更刁鑽，貓、狗、猴子腦、禾花雀等不提，今日就帶大家去食蟾蜍（北方人叫佢做癩蛤蟆）、蛤蚧（四腳蛇、又名壁虎）和水蛇。如果由深圳羅湖去番禺，食過中午飯後，乘專線大巴，上車小憩一陣，一小時又四十分鐘，就抵達鬧市市橋鎮。
記者：辛汀 攝影：Manny
一斤四腳蛇大概有六隻，剝了皮，再清除內臟，用筷子夾着放入滾熱的鍋中，滾五分鐘就熟。講都唔信，最美味、最多肉的部位，竟然就是尾巴。除了將之灼熟外，還有其他食法，如蛤蚧燉鷓鴣或燉全雞；亦可試試蛤蚧燉田雞腿，聽說有禦寒的作用。
食客直擊：
梁先生：「我呢煲火鍋，鍋內已經有蛤蚧、蟾蜍。𠵱家再加埋蛇碌，之後啲湯真係好正。我經常來這裏吃飯，覺得佢哋嘅食物非常新鮮，全部係即叫即劏，價錢亦非常經濟」。
沈太和仔仔「我陀BB時經常來食，𠵱家仔仔咁大個，我都一樣來幫襯，蟾蜍和蛤蚧都好補。」
松記餐廳
地址：番禺市橋鎮東沙村工業二區（東環派出所前300米）
電話：（86）2084873261
野生青蛙已被國家列入受保護動物，禁止捕捉食用，廣州人乃改食蟾蜍(癩蛤蟆)。餐廳飯店若要賣呢樣食物，須向政府申領牌照。一斤活生生的蟾蜍斬頭、剝皮、清除內臟後，僅剩餘四両半。蟾蜍肉質鮮嫩，食法有五種：火鍋、美極、椒鹽、煲粥和煲老湯(加入綠豆、雞、瘦肉、果皮)等。佐酒最好係椒鹽或美極食法，番禺餐廳供食用的蟾蜍，貨源多來自廣西、江西、四川和山東四個省分。
番禺境內水道交錯，原本有很多水蛇，老一輩人都經常食，𠵱家水蛇少咗，食嘅人多咗，惟有倚靠外地，從越南、江西省等地進口。十幾年前，水蛇幾毫子一斤，現今已賣幾十蚊一斤。水蛇煲粥係最普遍嘅食法，其他尚有煎焗、荷葉清蒸等。另一食法係將水蛇生劏剝皮後斬件醃製，再放入油鍋生炸，上碟前加椒鹽拌勻，吃時按每件的彎卷狀況，反向一拗，使骨與肉稍分離，再用牙撕其蛇肉，其香無比，誠為佐酒佳品。
水蛇煲粥有兩種做法，一係起皮，另一是不起皮。水蛇皮爽，咬落啲皮勒勒哋；而蛇碌用手撕肉別有風味，蛇春好似雞蛋黃咁，咬落好多粉。食水蛇要識得食，如果咬到蛇鱗，一定要吐出口，吞落肚如果吞得多，會引致肚痛或肚屙。不過凡殷實嘅店舖，都會將水蛇鱗片清理得非常乾淨。
水蛇價錢：店舖賣水蛇粥，蛇價分五級。由中蛇33蚊/斤數起，大蛇40蚊/斤，蛇王48蚊/斤，特大蛇王55蚊/斤，頂大蛇王66蚊/斤。
食客直擊：
梁小姐：我由細到大都食水蛇粥，我認為我啲皮膚咁靚，都係因為食水蛇粥的緣故。」
永恒餐廳水蛇粥
地址：番禺市橋鎮迎賓路龍美村口
電話：（86）2084890133