俄羅斯美少女舒拉寶娃（圖一）噚日就喺球場隔籬個網球嘉年華舉行簽名會，以佢嘅美貌，立即吸引過百球迷排長龍攞簽名，而舒拉寶娃就好nice，無論簽場刊、網球、海報，甚至同球迷合照都冇問題，難怪佢成為今個賽事風頭躉。
講番網球嘉年華，今年就有一間車行擺設兩架好得意嘅房車做宣傳，成為全場焦點；由於架車外形特別，吸引好多大人細路上車玩番一陣，不過有冇人睇睇吓波去買架車返屋企呢？
雖然噚日只係新曆元旦日，但大會賽前亦安排咗舞龍隊，同球手一齊舞龍繞場一周（圖二），充滿節日氣氛；不過未開始之前，條龍就俾風吹跌，成條瞓響球場中心，新正頭，認真「唔老嚟」。