雖然今年嘅經濟環境，預期未能令人感到樂觀，不過依然有人睇好前景。至於亞Mark呢？則抱着一定希望。無論點都好，對於今年嘅香港汽車市場照目前情形睇嚟，相信會比2002年更熱鬧，預計推出嘅歐洲新車款，不下二十多部，幾乎個個月都會有新車，唔信？就等我亞Mark率先同大家介紹一下，今年有望在港推出嘅歐洲新車啦！
記者：Mark哥
逢星期一至日刊出
繼去年嘅156GTA之後，愛快今年上半年又會推出升級版嘅147GTA；此車同樣用上一台3.2公升V6偈，最大馬力250匹，以呢部細車配大馬力引擎嘅147GTA睇嚟，有直迫奧迪S3同雷諾ClioV6之勢，定會令人心動呢！
納入福士旗下嘅賓利，去年經已宣布推出全新ContinentalGT跑車，早前亦曾來港亮相藉此招徠買家；呢部只賣180萬嘅賓利全新Coupe跑車，將會配用一副福士嘅W12引擎，馬力約500匹以上，車廂相當奢華，而且重係賓利與勞斯萊斯劃清界線嘅第一款新車，據講香港首年Quota已賣得七七八八。
其次，將會響1月中旬正式亮相香港，重有Arnage嘅RLLimousine長陣版豪華轎車，擺明車馬挑戰寶馬760Li，甚至乎係勞斯萊斯新車咁話，以其330萬車價亦相當合理㗎！
全新積架XJ車系經已響去年嘅巴黎車展中亮相，相信今年亦會好快到埗；新車最特別之處，會係引用咗奧迪嘅技術，採用全鋁合金車身製作，包括車殼及地台，外形比較接近面世不久嘅X-Type車系；而動力方面則會有3.0V6（238匹）、3.5V8（262匹）、4.2V8（300匹）以及Supercharged嘅4.2V8（400匹）等等。如果亞Mark無估計錯誤的話，新車將會對平治、奧迪等豪華轎車帶來一定衝擊。
去年銷量幾何升級嘅標緻，今年暫時無乜新動作，唯一新車相信會係307CC，至於幾時到港就暫時未知；不過，除咗開篷307CC外，好有可能重會有MPV嘅807，以及標榜高性能嘅206RC㖭！
已經密鑼緊鼓嘅Maybach，將會響今年有所行動，新車由平治負責生產，級數同勞斯萊斯、賓利相若，每部車均會依照顧客要求度身訂做，一切售後服務亦有專人負責，車價約四、五百萬一部，況且年產只有約一千部，真係有錢都未必買得到㗎！
保時捷今年嘅新車，係去年底推出嘅Cayenne四驅SUV，預計今年第二季正式抵港，用上一台4.5公升N/A及Turbo偈，售價分別係78萬同128萬，聽講啲定單經已應接不暇，香港人無錢？假嘅！屆時代理重會配合Cayenne到港，會響黃竹坑開設新維修部㗎！
富豪今年嘅大計，莫過於首次推出七座位SUV嘅XC90。呢類七人車既然坐得人多，自不然要着重安全性。以富豪嘅安全牌頭，亞Mark絕對睇好佢嘅潛力。另外，今年佢哋亦會有一系列高性能版本到港，包括S60R同V70R，前者會用一台由KKK提供Turbo嘅2.5公升引擎，最大馬力有成300匹，至於V70R，則以旅行車V70為基礎，馬力輸出與S60R相若。
去年可謂奧迪成功嘅一年，每當有新車推出都能令銷量提升；至於踏入新一年，最矚目會係配Tiptronic波箱、兼且屬Facelifted新版嘅TT；今年加入Tiptronic半自動波箱，可以肯定會對銷路有好大幫助。不過頂級嘅3.2公升版本，就分分鐘要年尾至可以抵埗呢！
除TT之外，另一款受人注目會係今年上半年抵埗嘅奧迪旗艦，全新A8車系會加入多項先進系統，比舊款更加前衞，並具備有一台4.2公升V8引擎、Quattro四驅系統，而車廂配備亦見豪華，預計新車售價會響90萬左右。
然而，另一款備受注目嘅S4，亦有望響今年抵埗；新車同樣會有四門及五門旅行車型號，今次引擎配搭亦會升級，改用一台4.2V8引擎，最大馬力有成344匹，0至100km/h只需5.6秒，真係一啲都唔講得笑。如果無估計錯誤的話，今年年中應該會抵埗。
全新Fiesta已於去年尾抵港，成為福特今年多款新車抵港嘅序幕，稍後時間將會有多高性能系列如FocusST170、MondeoST220等等，而開篷玩味十足嘅就有StreetKa，甚至概念嘅C-Max都有機會正式投產；照亞Mark睇嚟，今年福特將會有一番新作為，最低限度啲產品會走年輕人路線，從而予人有耳目一新之感嘛！
今年最受矚目嘅寶馬新車，相信非開篷嘅Z4莫屬，此車除用以取代Z3嘅全新開篷跑車外，並注入有多項新概念，不單止外形全面革新，而且重配備有更多電子裝備，引擎亦分有2.5公升及3.0公升版本選擇，再配合一套5前速+/-半自動波，售價亦只不過係40萬起。據講訂車者大不乏人，相信當今年3月抵埗之時，好有可能掀起另一場Roadster熱潮呢！
另外，當然不能不提同樣會於今年3月抵港嘅旗艦級車系——760Li啦！此車配備有一台V12引擎，車廂豪華至極嘅程度，加上本身高科技設計，賣160萬起依舊備受車迷追捧，今勻平治S-Class肯定備受壓力喇！
沉寂多時嘅歐寶，去年一口氣推出幾款新車，今年代理重點會放喺全新Vectra身上，呢款新車響歐洲評價甚高，甚至乎連Omega都由佢取代。到港嘅Vectra會有2.2直4同3.2V6兩款，又有加減半自動波，分分鐘歐寶會憑Vectra響2003有番新作為㗎！又豈會讓平治、寶馬及奧迪專美呢！
啱啱喺歐洲取得2002年度最佳汽車嘅雷諾MeganeⅡ，相信會係今年內到港，新車無論操控、性能以及車架都評價極高，以近期雷諾嘅製車水準，MeganeⅡ分分鐘係2003年嘅戲肉呢！若然新車售價吸引的話，相信會係標緻307，又或者係福士Golf嘅勁敵㗎！
由1月1日起，勞斯萊斯香港嘅代理權正式由森那美接手，據聞由寶馬接管嘅RollsRoyce車廠，新車3月至正式投產，所以新代理亦要3月後至開始運作，而部車到港最快都要4月左右。早前，睇過新車Pre-view嘅富豪表示，新勞斯萊斯猶如科技與藝術嘅結晶，而我哋1月上旬重有特派記者直擊報道，係《車天車地》版嘅Fans，就要密切留意喇！
同歐寶一樣，紳寶去年無乜新車，成績表現一般。不過，今年將會有全新9-3坐鎮，情況應該會有好大改善。據我哋《車天車地》版四眼編輯嘅親身直擊，新9-3非常之正，正嘅程度超越以往任何嘅紳寶，所以，只要定價合理的話，分分鐘會有出人意表嘅銷售成績亦唔定，一眾德國車代理唔好掉以輕心呀！
今年頭炮必定係開篷嘅Beetle，大部份機械結構同硬頂一樣，但就由美國製造，未推出已經吸引咗好多買家注意，今年第2季有望正式抵港；此外，勁版GolfR32亦會喺嚟緊農曆年後抵埗，呢部堅料之作屬限量生產，賣38萬多依然有唔少車迷訂購。另外，同保時捷Cayenne相同設計嘅Touareg，亦會喺年中到港；至於頂級Phaeton豪華轎車，消息話會響2003年底到港。