大除夕半日市，恒指在連跌4日後，終現反彈，收市9321，升48點，交投淡靜，不足17億元。
粉飾櫥窗活動都幾活躍，有心人唔少。噚日大市雖然只在40點的窄幅內上落，但上升股（不計認股證）就由開市後的百多隻，一路係咁增加，特別係臨近收市前的半個鐘頭，升得重急，結果全日有超過300隻上升，而30大上升股嘅升幅由10%至35%不等，除巨川國際（2903）因大手上板令成交有1576萬元外，其他嘅成交都唔配合。
大市連跌3年，02年嘅跌幅係18%，但個別藍籌股嘅跌幅去到3至5成，細價股唔少更只剩番個零頭。02年20大下跌股份，跌幅由88.4%至98.4%，其中唔少係抽水股同插水股。
至於02年20大上升股（好事不妨點名），最威水係嘉利國際（1050），全年升幅263%，排第20大的愛高集團（328），升幅亦有136%。20大之中，唔少係工業股，包括福田（420）升238%、立信工業（641）223%、葉氏化工（408）169%、星光集團（403）154%，以及創科實業（669）136%等。
噚日下跌股都有過百隻，宜進利（304）係其一，收0.26元，跌半仙。上月初，本欄曾作推介指其PE偏低息率吸引可吼，但當時股價（0.305元）已大幅上升，短線已呈超買，只宜趁調整完成時才吸入。宜進利股價現時已落番去0.25元支持位水平，低吸機會已出現。
宜進利係工業股，由生產鐘表而轉型至產銷及維修，以及名牌代理，PE低得並不合理，03年3月止年度的上半年，盈利繼續有增長，並且係4年以來首次派息，全年盈利料達4800萬元，每股盈利12仙，全年派息估有2.5仙，預測PE2.2倍，息率9.6厘，PE偏低得吸引。
宜進利去年8月供股集資6600萬元，大股東及一致行動人士持股權升至50.4%，供股後手頭現金及等同現金項目有1.79億元，足供未來進軍維修市場之用。去年9月底資產淨值6.34億元，每股淨值1.15元，現價折讓77%！
郭兆誠