港選手新年願望尋開心

○二年，在一片破產、通縮、裁員、及減薪潮下，香港人又真真正正過了多少天開心日子？今日元旦，簡單一句「HappyNewYear」已變得難能可貴，香港運動員有着逆境求存、樂天知命的性格，遇到挫折後，他們又用甚麼方法令自己再展笑顏呢？

許長國（保齡球）
唔開心會做啲乜？
釣魚，因為有機會畀我平和心情，其實成功同失敗都係一個循環，有得必有失，只要用平常心面對，唔開心嘅事總會淡忘。
03年願望：身體健康

胡兆康（保齡球）
唔開心會做啲乜？
聽鋼琴音樂，紓緩唔開心情緒，跟住諗番啲開心嘅事，再定一啲容易達到嘅目標，令自己重拾自信。
03年願望：考好會考

陳慧琪（滑浪風帆）
唔開心會做啲乜？
瞓覺，我係嗰種瞓醒覺就所有唔開心事都唔記得嘅人，瞓覺總好過一個人鑽牛角尖。
03年願望：打入世界頭5名

梁志榮（足球）
唔開心會做啲乜？
約班朋友傾吓偈，唔好諗埋一邊，個人就會開心番。
03年願望：身體健康、世界和平

何兆麟（單車）
唔開心會做啲乜？
我會不停咁笑，重要笑得好燦爛，無論自己或者身邊啲人都會感染到歡樂氣氛。
03年願望：踩得愈來愈快

金判坤（足球）
唔開心會做啲乜？
祈禱同多啲諗開心嘅事。
03年願望：祝香港人生活開心

翁嘉茵（划艇）
唔開心會做啲乜？
我會做大量運動，令自己攰到眼瞓，咁樣所有唔開心都唔會再諗。
03年願望：開開心心、更進一步

羅曉鋒（划艇）
唔開心會做啲乜？
滑浪同瞓覺，我份人好簡單，去海灘玩一大輪，或者大覺瞓，就乜嘢唔開心都會忘記晒。
03年願望：事事順利、心想事成

後記
聽完一班運動員嘅開心秘訣，其實所費無幾，亦都好容易做得到，老套講句：「凡事睇開啲，自然心情都開朗啲喇！」