今個月二十二號，廉署首度同國際刑警合作，舉辦「跨域攜手滅貪污」國際大型反貪會議，近五十個國家同聯合國等國際組織嘅四百幾個代表會出席。
廉署噚日搞咗個記者會宣布會議詳情，三日會議共有四個全體會議專題討論環節，其中一個題目睇落好有針對性──「鞏固警務人員的廉潔操守──經驗交流」。
警廉關係向來敏感，點解要特別討論警隊嘅操守？李少光此舉豈非明剃一哥曾蔭培眼眉？籌備會議嘅執行處首席調查主任朱敏健推莊話，個題目係國際刑警提出，因為佢哋係警務工作嘅國際組織，好關注呢個問題。大會到時重會派發一本《最佳模範行為集錄》嘅反貪天書，綜合咗調查貪污嘅秘訣同方法，好似卧底行動、保護證人咁。
廉署初步預計成個會議要用一百萬，但𠵱家財政緊絀，所以第一次要收番參加者會議費，包埋歡迎酒會同晚宴，每位盛惠二百二十美金（約一千七百幾港紙）。
另外，一哥最近抽空同黎明去元朗大棠圍村為公益金百萬行拍宣傳短片，佢阿哥曾蔭權都有上鏡，兩兄弟分開兩日拍，並無碰頭，套片今日開始喺各大電視台播放。
傳真︰2623-9278
電郵︰