元旦日有乜新年願望呢？希望嫁得出？搵到個阿嬌阿Sa咁嘅女友？不過，喺今時今日咁嘅經濟環境下，唔少人都想「嫁或娶個有錢人」，而星相學家愛麗斯就同大家打氣話：「其實每個人天生都有呢方面嘅本能！若果先天不足，後天發力都一樣有機會扭轉乾坤！」
記者：李玉蘭
最易嫁個有錢人星座依次序：山羊、天蠍、水瓶
最易娶個有錢女星座依次序：金牛、天蠍、處女
最難嫁娶有錢人星座依次序：白羊、獅子
山羊座（21/12-19/1）
成功排位：第1位，山羊仔係中游分子
代表人物：楊恭如、言承旭、鄺美雲
03年蜜運指數：8（10為滿分），關係開始穩定
山羊女重名又重利、熱愛權勢、鍾意物質享受，但亦好死心眼，要同自己心愛嘅人一齊捱一齊向上，但亦有另一種，就係發揮山羊座天生留住男人嘅本領，最Top猛人都飛唔出佢手指罅。羊仔好大男人，鍾意講求門當戶對，根本唔會入贅，唔會浪費時間去搵有米人。
催運攻略：男山羊須放下門戶成見，多啲製造浪漫
白羊座（20/3-19/4）
成功排位：第12位
代表人物：梁詠琪、陳豪、成龍、曾志偉
03年蜜運指數：7，平穩，沒大起跌
白羊可以話大男人、大女人星座，個個都好有自己個性，鍾意自己話事，下下都要贏，Enjoy以自己能力搵錢多過靠人，認為咁重更加有面。咁鬼好勝，點會頂得住豪門嘅多多禮節！
催運攻略：唔好過份自我，多啲為對方或對方家人着想；但得手之後，頂得幾耐就要睇你造化喇
雙子座（21/5-20/6）
成功排位：第7位
代表人物：張栢芝、張燊悅、章小蕙、容祖兒、周渝民、佘詩曼
03年蜜運指數：8，上半年較下半年佳，有結婚可能
雙子座鬼主意最多，口齒伶俐，冧人有一手，所以要追個有米人，絕對難佢唔倒！問題係佢非常無耐性兼善變，令對方覺得佢係𠝹仔𠝹女王而離開佢，但其實骨子裏佢最享受愛情，唔會Care對方係咪有米之人。
催運攻略：別太招搖，別唔實際，別善變，別無耐性，別太花巧嚇怕人
巨蟹座（21/6-22/7）
成功排位：第8位
代表人物：梁朝偉、張學友、周星馳
03年蜜運指數：9，全年都是戀愛季節
巨蟹座本身係一個傳統溫柔、守規矩、重視家庭嘅人，係出名好老公或好老婆，容易吸引人，亦容易融入富裕之家。特別蟹仔出名細心，唔介意同對方屋企人同玩同吃，所以機會較大；而蟹女生性敏感，會因自卑而顯得神經質，常自尋煩惱。
催運攻略：多出外見世面，顯示大方得體、豪爽一面，可減自卑心，人都開心啲
獅子座（23/7-22/8）
成功排位：第11位
代表人物：王菲、鄭秀文、陳奕迅、許志安
03年蜜運指數：6.5，感情不穩，已婚者多風波
獅子座鍾意物質享受、自尊心強，重視自己多過全世界，尤其獅子女，希望靠自己實力，不想叨別人嘅光，認為自己搵錢好過做有錢人嘅依附，絕不會為結婚而無咗自己。
催運攻略：須稍稍放下自尊心，尤其獅子女，唔小鳥依人啫，都唔使下下撐到行
金牛座（20/4-20/5）
成功排位：第1位，牛女入五甲
代表人物：周潤發、林憶蓮
03年蜜運指數：7.5，關係好轉，難題獲解決
金牛講求實際，重視生活質素，牛仔完全唔貪戀靚女，貪威識食得個樣嘅女人佢就最怕，而且佢哋出名勤力識揀擇，重利多過重名，最有本事將好女人留喺身邊。
催運攻略：金牛擅於理財，同有米之人好能互相吸引，若果能加啲浪漫㖭，就更加掂過碌蔗
處女座（23/8-22/9）
成功排位：第4位（男比女成功率高）
代表人物：鄭希怡、謝霆鋒、蔡少芬、鄭裕玲、陳慧琳
03年蜜運指數：6，多爭執，愛情大上大落
表面上處女座係完美主義者，事事要求高，唔易睇得人上眼，亦唔介意做獨家村；但揭穿底牌，其實最易受傷害，唔易付出真感情，但千算萬算之後，始終都係最嚮往獨居或同居生活。
催運攻略：唔好得把口，行動最實際，改吓含蓄被動性格。否則蘇州過後冇人幫到你
天秤座（23/9-22/10）
成功排位：第9位（女比男容易）
代表人物：劉德華、陳冠希、梅艷芳、關之琳
03年蜜運指數：8，上半年結良緣，能維持至下半年，可望成真命天子
天秤座係最有魅力嘅靚仔靚女，不但本身桃花多，重勁鍾意戀愛、浪漫，同甜言蜜語，唔多介意對方有冇錢。如果佢係鍾意你，佢會開大Volt數電暈你。其實大使兼唔識理財，所以好適合嫁娶有錢人。
催運攻略：天秤女不妨多去有錢人出沒地方，結交公子哥兒；天秤仔就要畀多啲安全感對方
天蠍座（23/10-21/11）
成功排位：第5位，男比女成功機會大
代表人物：周慧敏、林青霞、余文樂，蔡卓妍，張小嫻、朱茵
03年蜜運指數：9，充滿歡樂，或會拉埋天窗
天蠍座不但重視物質生活，還想愈活愈好，呢種動力已令佢哋成功一大半，加上神秘、性感迷人嘅本質，同機智騎呢多計，韌力驚人，所以只要鎖定目標，往往有極高成功機會。尤其天蠍仔好識捉摸女人心，事業上能得到女性幫助。
催運攻略：天蠍女盡情發揮性感魅力，切忌擺出佔有慾和妒忌心
人馬座（22/11-20/12）
成功排位：第10位
代表人物：周海媚、郭可盈、劉嘉玲、黎明
03年蜜運指數：9，多桃花，應把握良機
天生熱情奔放，無階級觀念，又冇自尊心包袱，鍾意四圍去，真係好適合搵個有錢人畀佢揮霍放肆，但因佢太無耐性，又唔介意對方有米冇米，佢願唔願意留低，反而至係問題。
催運攻略：改變對愛情過份理想化嘅期望
水瓶座（20/1-18/2）
成功排位：第3位
代表人物：黎瑞恩、鍾楚紅、鍾欣桐、章子怡、楊千嬅
03年蜜運指數：9.5，如魚得水，幸福快樂
水瓶座本身多叻仔叻女，佢哋好重視進步同溝通，唔多重視物質，亦唔太Care有錢冇錢，所以唔會刻意搵有錢人，即使咁啱遇到，婚後都鍾意過一啲低調，優哉游哉生活。就係呢種本色，令佢更加矜貴。
催運攻略：適當地Show吓聰明本色，但忌太前衞嚇怕人
雙魚座（19/2-19/3）
成功排位：第6位
代表人物：趙薇、宋慧喬、方力申
03年蜜運指數：8.5，浪漫事不絕，年尾最如意
雖然雙魚唔多Care對方有冇錢，但有兩種人，一種鍾意自己力爭上游，另一種就聽天由命，感情用事，易受人影響兼俾人呃，理財又差，所以好適合倚靠另一半，亦自不然吸引到一個有錢人去照顧佢。
催運攻略：雙魚係最善解人意嘅星座，只要好好發揮，一定冇問題
愛麗斯小檔案
獅子座女生，先後於商台英文台、叱吒903及新城娛樂台當DJ；有線娛樂台《三妞十三座》、亞視《女人.COME》的星座及解夢主持，及報章雜誌專欄作家。著作包括《愛麗斯系列之明星夢》、《十二星座戀愛宜同不宜》等。電郵：