恭喜！恭喜！港台DJ梁繼璋趕得切喺○二年做爸爸，噚日十二月三十一號佢太太莊嬿藍（Athena）喺沙田威爾斯醫院生咗個仔，出世時間係中午十二點四十五分，BB重五磅七安士。
新任老竇梁繼璋鬼咁開心，佢話前晚突然收到醫院電話，話老婆就快生，佢即刻趕去醫院，一直等到噚日BB先出世，成晚都冇瞓過。梁繼璋有喺產房陪老婆，本來想影低個仔嘅出生過程，但護士話肉酸，叫佢唔好影，梁繼璋講笑話：「我諗諗吓都覺得啱，老婆咁私隱嘅地方，唔通拎畀親戚朋友睇咩！」
梁繼璋話個仔趕得切喺○二年最後一日出世，佢覺得好得意又好特別，至於囝囝個名，佢諗住搵堪輿家李丞責改。
而Athena噚日接受訪問時就話：「我好開心，好興奮。今次係用無痛分娩，但係都好痛，做媽咪好偉大，我老公都不停喺隔籬幫我嗌加油。我大肚嗰陣又搬屋又發生過兩次車禍，BB都可以順利出世都叫做好有福氣。」
九人女子組合Cookies噚日喺銅鑼灣一間時裝店做宣傳，不過其中兩個成員Elaine同Helena就缺席，隊長Stephy解釋話：「我哋噚日去咗番禺拍嘢，Helena唔見咗回鄉卡，唔返得嚟，而Elaine個工作證件就有問題，所以佢哋都嚟唔到。」Cookies話第一次喺大除夕開工，佢哋噚晚連趕幾場，搏命搵錢。
任葆琳前晚去尖沙嘴凱悅酒店出席Haagen-Dazs甜美生活派對，佢話平安夜嗰晚撞車，前日去警署備案。佢話自己大擺烏龍，本來要去西九龍警署，但係去錯咗東九龍警署。好彩啲警察仍然受理，唔使佢再行一次。佢重話要努力工作，搵錢幫補整車錢。
劉燁有份做嗰套《巴爾扎克與小裁縫》，入圍角逐金球獎，而張曼玉、梁朝偉同章子怡主演嘅《英雄》亦入圍金球獎，角逐「最佳外語片」。劉燁接受內地記者訪問時，佢話自己打過電話畀章子怡，重話約定佢喺美國相聚，而章子怡就窒佢話：「還是沒譜的事，別瞎起勁。」問劉燁對《英雄》有乜嘢評價？佢話自己重未睇，不過聽講話拍得幾靚。
梁敏儀同錢嘉樂喺電影《誘人犯罪》入面有唔少親熱戲，梁敏儀話佢選港姐嗰時已經識得錢嘉樂，所以拍親熱戲唔會尷尬，不過梁敏儀強調一定唔會露三點。其中一場戲話佢要喺好多人面前露大髀、擺誘惑姿勢，佢覺得都幾尷尬，遲啲有機會要向有豐富經驗嘅麥家琪請教吓喎！
黎燕珊噚日幫今日九歲生日嘅囡囡劉詠詩喺尖沙嘴舉行別開生面嘅攀石生日會。黎燕珊話：「工人話聽到囡囡同爹哋（指劉永）傾電話，囡囡問佢點解唔畀錢佢讀書，點知劉永同個囡囡講因為佢冇錢，我先同佢離婚。總之離婚至今，佢一毫子都冇畀過，我淨係希望佢唔好使埋晒啲無謂錢，要留番啲錢畀仔女做學費。」
