時光如流水，今日又係新一年嘅開始，二○○三年已向我哋揮手歡迎。謹借專欄一角，向各位講聲新年快樂，希望今年位位讀者都身壯力健，做生意嘅財源廣進，打工嘅，永冇炒魷魚兼升職加薪；女學生就青春常駐，男學生嘛，唔該你哋打少啲電子遊戲機，讀吓書，唔好成日俾女生領先！
講起女生，佢哋的確有敏銳觸覺。話說聖誕馬第九場跑警察盃，大熱門「電子金龍」殺聲震天，由廉記告唔入嘅霍達騎，既然以前廉記控告霍達騎「電子金龍」不成，呢次蔡約翰馬房肯畀佢再度執韁，冇理由唔搏甩髀啫，左丁山以為合理配腳兼有分頭嘅配腳就係蔡廐殺手戴勝騎嘅「綠色世紀」，點知沙田陳師奶在場話要買「必得勝」，此馬久無表現，騎師賴維銘又差半皮，有乜根據呀？陳師奶話：「我企喺沙圈觀眾席睇得好清楚，『必得勝』馬主許晉強夫婦與一大班朋友到場，圍埋一齊嘅有許先生好朋友許淇安，負責頒獎嘅現任一哥曾蔭培，哈！未來一哥李明逵亦企響度，好似重有李太㖭。你話嘞，前任一哥、現任一哥、未來一哥都嚟捧許晉強場，隻『必得勝』定搏殺，單Q搞掂。」
陳師奶言出必行，買「必得勝」、「電子金龍」單Q，真係依絲執，條Q派一百九十四個半，手到拿來，使乜事先刨馬！許晉強先生啲面子夠晒大，與警方關係密切，《蘋果》馬經原來早有提示，《蘋果》馬經呢排幾有料到，主編童輝哥仔好嘢！