我愛香港，受過了這裏的萬般好，更覺得要好好愛惜這塊土地。一年之計始於今天，能否大家真的振臂一呼，重整家園。其實成日話香港衰，實情係環境比好多表面話好嘅地方好上百倍，只不過人人話衰，唔衰講到衰。在目前大環境、大氣候不理想的情形下，如果有邊位大俠真係諗到啲咩方案能夠令政府?市民、勞?資雙方、北京?特區政府都話正，然後啲方案日後又真係行得通的話，呢位大俠唔止應該攞諾貝爾獎，畀個齊天大聖佢做都抵。
人最忌自己呃自己，但更忌唔肯自己呃自己，唔肯𠱁自己邊個嚟𠱁你，踩你兩腳就有份，放心，點都唔會諗到條大家都覺得啱數嘅實用橋，不如正正經經由政府發起，諗個要好幾年才會實現嘅夢，好似當日所有香港人向住九七衝一樣，到時嘅嘢到時至算，起碼過程中士氣如虹。
不如搵幾個編劇佬圍埋食吓飯，度幾條似是而非嘅靚橋，例如話大陸即將刮起中產移民香港熱潮，全部準備在港買樓。橋實用價值其次，最緊要「型」，香港人最鍾意「型」，成日覺得自己在亞洲最「型」，𠵱家無端端俾杰倫與F4「型」過晒，幾冇癮！好彩重有《無間道》，齣戲好唔好睇各說各話，但眾口一致話「型」，於是票房大賣。香港要「型」，政府都要轉「型」，唔「型」冇希望，一字記之曰「型」！新年快樂，祝大家2003日日都咁「型」。