米杜士堡季前簽入嘅意大利國腳馬卡朗尼，年紀輕輕已經成為英超聯射手之一，年少氣盛少不免有啲自以為是，領隊麥卡倫就決定上演一齣《馴悍記》。
自從九月開始鬧入球荒，馬卡朗尼終於響最近失去正選位，但係佢就唔服氣，抱怨領隊麥卡倫竟然用波錫同尼美夫都唔用佢，威脅要離隊；重話國際米蘭同埋祖雲達斯都打過電話搵佢過檔，講到自己成個球王咁款。咪一朝得志就語無倫次啦，畀你去到「國米」、「祖記」咪又係坐冷板！
麥卡倫似乎想雪吓佢先，嚟緊賽事就決定以上季中有過出色表現嘅韋倫作為第三前鋒，都唔用馬卡朗尼。啱喇，呢啲後生仔係要挫吓佢銳氣，咪等佢以為自己天下無敵！
真係要讚吓我哋《蘋果》體育組嘅同事先知先覺，噚日就為大家帶嚟第一手報道嘞。日前熱刺後衞薛基突傳入院開刀，當時各大傳媒都無清楚指出佢呢次受傷嘅嚴重性，惟獨我哋體育版就搵嚟專業人士，即時講出薛基係撞親大腿積咗瘀血，所以要開刀放血。結果英國《太陽報》響星期二搵番前修咸頓球員丹尼斯，響當年受同樣傷患嘅例子及圖片出嚟報道，呢單料我哋就係咁快人一步！
各支球隊都盡量趁今個月重開嘅轉會期簽入生力軍，利物浦亦一樣，重有傳領隊侯利亞將會有千五萬鎊買人。我求大俠就收到風，響侯生手上嘅收購名單當中，有一個目標竟然只係得四歲！原來係葉士域治嘅前英格蘭十六歲以下國腳岩布斯，佢嘅生日就啱啱係二月二十九日，八四年出世，所以到𠵱家都只係得四歲咋！
最近就傳出有好幾間大球會，想趁今個月轉會期重開簽入巴西「3R」嘅朗拿甸奴。唔知係咪咁嘅原因，令朗拿甸奴都無心再戀法國，響聖誕假期後未有返球會巴黎聖日耳門報到，重完全係無解釋，失咗蹤嗰隻！我求大俠就覺得始終都係一場賓主，立定決心離隊嘅話都應該交代一聲，好來好去嘛！
籃球明星姚明威水事迹又添一樁，就係佢之前效力嘅上海鯊魚隊，決定將佢着過嘅15號波衫榮休，姚明將成為中國籃球史上得此榮譽嘅第一人；不過姚明話美中不足，就係佢老竇後生嗰陣同自己都係着15號，如果第日個仔又打籃球，就冇咗呢個「冧巴」嘅波衫。姚明啊，你婚又未結，以後生仔生女都唔知，使唔使講到咁長遠啊！