朗月清風難愜意，如何艱難的一年都總算熬過了。懷着迎接新年的興奮，香港人今日又抖擻精神，追趕新一年的願望！只要向前看，一天可以分別這麼大。
「新年新願望，呢幾年經濟唔好，都冇諗過升職加薪，唔使減人工已經好好啦。」加入警隊已經三年的姓江警員，形容去年本港的經濟太差，在新的一年他希望整體經濟會得到改善，人人有工做。
「經濟好番啲，市民都會好過啲，啲人都少啲犯罪，少人搶嘢、少人偷嘢，治安自然會好好啦！」江警員的新年新願望亦離不開本身「終身承諾」的警員天職，「梗係捉多幾個賊啦。」
「做內地新聞，唔係淨係跟住領導人，希望做多啲內地民生民情嘅新聞。」曾遭國家主席江澤民責罵「naive,toosimple」而出名的有線電視記者張寶華，從不以為報道內地新聞是「淨係跟住個領導人走嚟走去就得。」
她希望來年可以探討更多內地人的生活，像去年她曾報道內地一個麻瘋村，「雖然新聞出街後，好多團體都肯幫佢哋，但內地政府唔畀人再入去，好似話因為我個報道出咗街，有人唔係咁鍾意。」她希望中國以更開放態度面對傳媒。
在餐廳做送外賣五、六年的梁先生，有一個特別「顯眼」的身軀，原來他體重達二百五十磅，但並無影響他一派樂觀性格。「新年願望梗係希望香港經濟會好番啦，市民出街消費能力都會強啲、好啲，個市都會好番，好多人有工開。」
「我嘅願望係最好唔使炒魷魚。」會唔會減肥？「梗係唔會啦，重希望繼續增肥。」他說：「新年願望係食多啲嘢，食到愈肥愈好，肥到可以做相撲手，然後去日本發展，唔使喺度挨騾仔咁辛苦。」
做中港運輸司機的郭先生，賭馬已經有十多年，不時都會贏一萬幾千，他的新年願望當然要贏到大錢：「賭咁多年，新年新願望梗係最好中三T啦，中番鑊甘甘哋，中番幾百萬咪可以歎下。」
不過，做貨車司機幾十年的他仍然都係希望香港經濟好轉，「因為呢半年生意唔好景，台灣好多貨櫃都直接運入大陸，香港司機處於半開工狀態，如果新一年環境好番，能夠帶動運輸業，做司機咪多啲貨櫃送，多啲工開咪好囉。」他衷心祝願新一年經濟好轉。
「對政府已經死心，講一套做一套，又話畀市民有生存空間做小販擺賣維生，點知販管隊日又拉夜又拉，拉無牌小販就話非法擺賣，連我哋有牌都拉話阻街，咁叫我哋點搵食呀？」賣襪的梁女士一肚子怨氣數落販管隊趕絕他們生計。
做小販二十多年的她說：「新年有乜希望？根本冇期望，見步行步囉！咁嘅政府重有乜希望？」
「新一年香港一團和氣，廿三條圓滿解決！」身兼資深大律師的余若薇，○二年與不少法律界人士都對政府「硬銷」《基本法》第二十三條不敢恭維，更多次挺身反對：「但係政府唔好話真諮詢，連假諮詢都唔做，重搞到社會分化。」
她認為政府可考慮以全民公決方式，詢問市民是否要求白紙草案作諮詢：「廿三條同全香港人都有切身關係，唔好以為唔關你事，希望政府可以聽從民意，圓滿解決廿三條啦。」至於可否如願，她笑說：「我做人好樂觀！」
「希望保險同汽油減價，我又可以買㗎奧迪跑車。」Ruby一身OL打扮，但她坦言不愛束縛：「最鍾意揸車，自由自在。」迄今擁有兩部車的她經常閱讀汽車雜誌：「我嘅dreamcar係AudiTT，都唔平㗎，要三十六萬，做人梗係要有希望㗎！」
她說：「希望啲保險費唔好再加啦，根本𠵱家都貴到唔合理，重有啲油費又貴，真係攞命！」
「我希望做媽媽嘅波士。」孔皓彥及余浩誠是同學，總愛一起到維多利亞公園「放船仔」，浩誠認為母親太管束他：「成日都係媽媽做波士話晒事，新嘅一年希望我話事啦！叫媽媽買多啲玩具。」至於錢從何來？他答：「當然係媽媽啦！」
皓彥希望得到一架快速遙控船：「𠵱家嗰隻太慢，唔夠人快。」他母親說待經常在北京公幹的爸爸回來才買給他；若要他選擇，他寧願爸爸常常在港陪伴他，還是得到玩具船時，他笑說：「梗係要船啦！」他說畢望一望母親後偷笑。
「我希望新一年唔好再有咁多嚇人一驚嘅港聞頭條，好似單趕阿媽去做乞兒咁，好誇張，以前社會好似冇咁多呢類新聞，唔知係咪教育問題，我唔係要挺董，但亦唔好將所有責任歸咎政府。全球經濟都唔好，我希望經濟復甦，唱片業市道好轉，我以前喺寶麗金時代成績好似冇𠵱家咁好，但賣碟量一定好過𠵱家，一賣就十幾萬張，𠵱家要賣咁多簡直難過登天。○二年電影有人投資四千幾萬，搵咗四大影帝拍齣《無間道》，我希望唱片嘅《無間道》都快啲出現，可以有多啲唔同公司嘅歌手，打破門戶之見，一齊合作。」李克勤盼○三年經濟復甦。
「啱啱生咗個BB女，使費、開支、負擔都大咗好多，出年經濟都唔係咁好，暫時都唔敢再生仔女住。」葉太抱着初生十多日的女嬰，雖然經濟壓力令一家人喘不過氣，但她還是一臉幸福。
葉先生是三行工人，○二年大部份時間開工不足，葉太說：「新年新願望自然係希望經濟好番，等老公都開足工，咁成家人生活都會充裕啲，經濟好轉至計劃生多一兩個仔女，等囡囡唔使咁悶。」
到美國留學的Donny每年寒、暑假都會返港，他是一個典型足球迷，返港之後都會約朋友睇波同踢波。「我由細到大都鍾意踢波同睇波，尤其係世界盃，今次亞洲足球水準好高，我希望本港的球隊水平亦能夠相對提高，唔好畀歐洲人踢晒就好啦。」
Donny除了喜歡足球，亦心繫香港，他除了希望本港足球運動有長足進步，亦希望政府注重環保：「今次返港發覺空氣較往年渾濁，垃圾又多，政府要多改善市容，最後當然希望世界和平。」
「希望樓市復甦！但都要靠奇迹，唔通真係靠孫九招咩？」吳先生是「無殼蝸牛」，以月租五千多元在九龍區一單位獨居：「𠵱家樓市咁差，政府出咩招都冇用，呢頭買完樓嗰頭變負資產！」他希望○三年香港霉氣一掃而空，股市樓市興旺。
「真係買樓，想買港島區嘅樓，因為成日覺得港島區乾淨啲。」他與父母原本居於港島，但為了獨立而搬出來，又為了方便工作選擇在九龍區居住：「到時買一間百幾二百萬嘅樓，間樓不斷升值……哈！我都知好難，但講願望就梗係講得盡啲啦！」
「今年可以原校升讀中六就好，因為要有四個A先有機會。」文小姐成績不俗，就讀學校的精英班：「會考唔係好難，只要留心啲都可以。……我讀英華，除非會考考到二十七、八分，即係科科B或者有4A，先入到中六。」
好學生都為會考煩惱，她認為是香港教育制度之錯：「名校搞得好，唔怕政府成日朝令夕改嘅政策影響。」但她有信心就算不能入讀原校，將來亦能升讀大學：「希望在明天呀！」
「香港咁大，我只係希望政府畀少少地方我哋玩滑板啫。」力宏言談間彬彬有禮，可惜仍被視為「壞孩子」：「因為我成日喺呢度玩滑板。」力宏與朋友常在維多利亞公園人流較少的一角玩滑板，經常遭管理員驅趕：「因為呢度唔畀玩。」他只好東躲西避「打游擊」。「其實玩滑板係健康嘅運動，點解唔可以畀多啲地方我哋玩，有啲公園平日都唔係咁多人，指定一啲地方畀我哋玩，咪好過我哋喺街度玩。」他希望政府重視青少年。
「新一年希望個個大吃大喝！」美孚好世界酒樓光榮結業，「好心老闆」張世雄待員工有情有義；張老闆現經營另一酒樓，慨歎生意仍然難做：「啲人冇嘢做，去酒樓都少啲啦！」但他毫不氣餒，繼續力挽狂瀾：「只要搞好啲食物質素，維持平啲價錢，都有得做嘅。」
去年他經營了近三十年的「心血結晶」被迫結業，難免神傷；他希望○三年：「失業率減少，個個有雙糧，老闆賺大錢，咪多啲人飲茶囉！」
