今日係2002年嘅最後一日，回顧過去？Out喇，我哋應該向前望，睇吓明年Hit啲乜、玩啲乜重好啦！不過，有啲嘢今年雖然唔成氣候，但出年可能會鋪天蓋地都未定，好似余文樂咁，今年其實都唔錯，重多個「𠝹女王」稱號㖭。但據堪輿學家馬禮華預測，佢03年4月將會更紅更多新聞，而鄭秀文亦多多是非；重有我哋嘅國寶NBA十優狀元姚明都會紅到爆！重有啲乜？睇吓我哋以下兩版嘅介紹啦！
記者：除夕好玩組
部份攝影：副刊攝影組
現為「宇宙五術專業學會」副會長、網站、報刊玄學顧問及專欄主筆嘅堪輿學家馬禮華預測，有份拍02年最賣座電影《無間道》嘅余文樂，03年初雖然仍處於人氣低潮，但4月後會反彈，人氣急升，而且因與唱片公司產生問題，一直成為傳媒追蹤對象。現時余文樂正發展地下戀情，且看一班傳媒能否發掘出來！
馬禮華續稱近日因新戀情而再成為記者採訪對象的Sammi，03年雖想力求低調，但新聞依然一大籮，而且每次都是麻煩事。約7月她會經歷一次大破財，與新情人更有分手危機。尤其Sammi的健康會日差，咁多新聞，想不成為新聞人物也難。
連鎖運動服裝店負責人P仔：「作為今年NBA十優狀元、中國十佳運動員第二，姚明真係愈嚟愈有市場，佢着對NikeShoxLimitless賣$989，好受籃球迷歡迎，呢個月都係波鞋銷量榜Top5！雖然同朗拿度、碧咸等重有一段距離，但如果佢打波水準回勇，又或買波鞋會有多啲嘢送，佢嘅人氣指數重有得升㖭！」其實，𠵱家喺美加等地，姚明熱已經燒得㷫烚烚，嗰種瘋狂程度，就嚟吹到香港喇！
波鞋加個轆，即時風靡萬千少男少女，暴走鞋絕對是02年潮流Icon。而暴走第二代──暴走番梘鞋亦將於明年1月6日抵港，將多年前興起嘅X-Game番梘鞋加入暴走元素，可以滑行又可以喺欄杆度跣來跣去，花式更多更刺激！
今年喺明星推波助瀾下，不論短暫或永久紋身都好流行，纖腰紋身加低腰褲更是潮流。出年重興唔興？紋身師傅Leo就話：「重興，但出年應該有更多人玩永久紋身。位置就由後腰轉到膊頭或鎖骨。圖案除了荊棘，中國化古代圖案如圖騰都會Hit。」
緊貼日本市場、NamcoWonderPark負責人林先生：「OnlineGame都差不多飽和，我哋都出過，但唔多受。而喺03年，最興應該係對戰機，新登場係八人麻雀機，受歡迎嘅機種甚至會搞比賽。跟住係SaveCard，繼《頭文字D》後，最新足球機已吸引玩家儲分Upgrade裝備，愈玩愈專㖭。