環南中國海單車大賽花絮

師母打氣阿麟例掂
噚日「阿麟」喺台上領完獎後，落到台不久就將紮花送畀一位女士；細問下，原來佢正是沈金康教練嘅太太，港隊嘅「師母」。「阿麟」話每次師母在場，自己都會有好表現，例如三年前喺上海參加嘅亞洲賽，自己就曾喺師母在場下，得到計分賽第二名；噚日就保住「藍色戰衣」。

沈教練話賽期「騎呢」
沈教練早就講過每年一度嘅「環南中」嘅賽期夠「騎呢」，一來踏正聖誕節及新曆新年、二來又撞正係大部份隊伍嘅冬訓期。前者令到不少外國選手因假日問題而唔參賽，後者又令到冬訓緊嘅車手們「唔湯唔水」。佢建議最好喺緊接某些大賽如下月底浮羅交怡賽前，至少可以吸引去大馬參賽的車手來港作為熱身賽。

車手免費茶檔「熱」身
比起前幾天，噚日喺路環山嘅氣溫唔算太凍，不過，賽會就好體貼參賽車手，特別擺檔免費供應熱飲，唔少車手開賽前無嘢做，就去幫襯吓，暖暖身體，連日手骨骨碎退戰傷嘅澳洲車手居路都嚟趁熱鬧。