香港今年確係幾撞鬼，重要係幾好笑，不過香港人自己笑唔出，外人則睇到笑口噬噬，近年尾嚟一個大鬧劇，你嚟一個六萬人大遊行，我就嚟一個四萬人大集會，場面之壯闊更勝《英雄》。
當香港係一個大舞台，主角好自然就係政府內之各位高官，集編、導、監兼主演的伯伯明知自己不叫好亦不叫座，仍硬住頭皮係咁開戲，香港觀眾市民得個嬲字。大家心知肚明伯伯都只係一個聽命於投資者的工具，但信心已失，就算識變法術都難改大家嘅睇法。
其他幾位主角又更離奇，除了曾氏兄弟仍能保持明星風采，有幾分官威外，其他都紛紛轉戲路。松哥無端端變了流行曲歌手，其後更轉拍精裝追女仔，追女仔唔係問題，但同時要有作為，可惜欠奉。葉太本來係強硬式性格演員，一向慎言並以眼神交戲，但一個二十三條打亂其戲路，令其變成諧星，非常可惜。一路以嚟，以為葉太可接陳太棒成為柱躉式壓陣明星，但應是俱往矣。冇柱躉式明星就冇收視，你試吓《皆大歡喜》冇家燕姐、《男親女愛》冇DoDo姐，睇吓重有冇人睇？
新加入的幾位閒角則更嚇人，唔係肥頭耷耳成個叮噹咁，就係塊面成日咁長嘅少爺兵，呢類型格，只適合開塘西風月片，大家飲飲酒、猜猜枚、撚撚雀過日辰。在2002，大家已看厭了「Loser」樣，希望在2003，可以看見多些「Winner」。