球迷有福囉，終於有機會解開曼聯隊長堅尼嘅躁狂之謎。堅尼將會響下個月七號上英國Channel4電視節目接受大測試，據講到時主持人會播番七場堅尼有「案底」嘅比賽，然後回答問題，分析番佢「犯案」嘅心路歷程。
堅尼夠晒江湖地位，斷估唔使好似問題球證摩蘭奴咁，靠上意大利電視節目博出位。我求大俠估佢呢次肯上鏡，係想話畀人知佢做每件事都有理由，而唔係亂嚟，真係名副其實硬漢一名。但至怕佢到時控制唔住又講過火嘢。話晒佢前排先因為響自傳認踢人報復搞到一身蟻，停完賽，再亂嚟咪盞激死費爵爺？
雖然本港球迷無機會睇呢個節目，但英國報紙第二日肯定會大幅報道，到底堅尼過唔過到呢關？到時話畀大家知。
球隊戰績差，球員易磨擦。利物浦前晚同阿仙奴打成一比一平手，戰果唔失禮，好衰唔衰上演咗幕隊友爭射十二碼，肉酸死。話說下半場中段利物浦得到十二碼，首號慣性操刀者奧雲已經離場，照理跟住由梅菲射。不過迪奧夫唔知發咩神經，攞住個波走去罰球點。梅菲梗係唔順啦，結果佢拍走迪奧夫個波，再推對方一吓，自己射番。咁都得？
咪話我求大俠針對阿仙奴龍門施文伯伯，不過佢又出洋相，唔提唔得。前晚佢對利物浦時接波甩手俾巴路士射空門，好彩條柱救番施文一命。咁重唔止，多得G施華臨完場整球門前六碼射失，有呢吓經典嘢，重邊有人記得施文出醜嗰球波？講時講，好彩G施華球波唔入，否則紅軍領隊侯利亞唔心臟病發就有鬼，唉！之不過上盤客就……。
以前有個麥哥斯，𠵱家有個拿臣，恕我求大俠唔客氣講句，呢啲響蘇格蘭聯賽所謂嘅「入球機器」係咪真係咁堅？拿臣𠵱家入球數只係少過一個唔知名嘅愛沙尼亞前鋒，同另一個又係唔知名嘅阿美尼亞前鋒，好有機會再攞金靴獎。呢三個前鋒所屬嘅聯賽其實都唔係歐洲頂級；一諗到呢點就提唔起興趣。歐洲足協應該再改吓機制，等啲頂級射手多啲機會染指呢個獎啦。
佐敦狀態大不如前相信大家都知，佢亦一早講明𠵱家係用智慧而唔係體能打波。估唔到Gatorade（著名健康飲料）都幽佐敦一默，響嚟緊出街嘅廣告入面，講佐敦同公牛時期嘅自己「1on1」；重話全靠Gatorade，就嚟四張嘅佐敦同後生嘅自己重打得兩手。雖然我係「波神」番屎，但憑𠵱家嘅佐敦，真係打死我都唔信飲幾支Gatorade，就頂得住公牛嗰時嘅23號喇！