近排三四線股真係乏善足陳，表現最激莫過於復牌無耐嘅添發慶豐（2998），本月23日復牌至今，股價由2元直插至噚日收市0.26元，小初坐喺到睇戲都覺得心驚。
不過經紀陳話，呢類火鳳凰股，復牌後股價勁插係正常現象，最重要係幕後實力夠唔夠，對於添發慶豐新主嘅實力，其實毋庸置疑。
隻股未重組之前，因為不斷發行新股同可換股債券抽水，搞到股價一直處於1仙淨沽冇買盤嘅情況。今次重組併股後，散戶有機會沽貨，唔少人就算勁蝕都要套現，由於有太多不問價嘅沽盤，試問股價又點會升？
估計幕後人收夠貨後，隻股到時就有另一番光景，其實隻股近排雖然急跌，但一直都有買盤出嚟收貨，只不過係愈收愈低而已。
添發慶豐可能好似一兩年前嘅上聯水泥（1060），急跌後始終有次似樣反彈，不妨睇長遠少少。
慕容小初