若果畀得起兩萬零蚊租樓，𠵱家已經好多選擇，甚至租半山樓都得，但有租客就鍾情將軍澳區，世紀21安興董事鄺志輝對蘭西透露，南豐廣場啱啱有個複式單位，以全包每月2.2萬租出，個客重係一見鍾情㖭。
鄺志輝話個客係日本機構高層，透過另一間代理行嚟將軍澳區搵樓，睇過東港城嘅複式，結果成咗南豐廣場第5座複式，面積1611方呎，全包月租2.2萬，呎租十三個七，市價。
原來個日本客喺將軍澳區返工，因有房屋津貼，故要求有全屋家具，咁啱個單位係業主住開，所以一拍即合。
鄺志輝講，個客嗰間代理行專做日本人生意，之前都有帶客嚟睇分層單位，但就傾唔成，今次火速合作成功，佢哋都好開心，睇嚟呢種合作方式日後會陸續有來。
咁個業主點呢？原來租咗同屋苑另一個細單位，月租八千蚊，一來一回，唔使交租之餘，每個月重有錢落袋㖭。
利嘉閣03年首個拍賣會喺1月8號舉行，今次最貴重嘅物業係淺水灣南灣大廈十一樓銀主盤，連兩個車位開價1520萬，每呎5551蚊，早排七樓單位以千七萬成交咗，呢個層數高啲，開價平成二百萬。至於最平係元朗單幢樓金福閣低層435呎單位，開價二十五萬，呎價575蚊，平過大陸樓。實行以平低價吸引客戶競投。
唔少代理行都趁手尾回顧同展望吓明年市況。美聯噚日就搞新界區發展策略記者會，回顧今年員工嘅成績，做得好嘅同事，自然要有獎勵。
成年做得最好嘅分行係沙田瑞峰分行，營業額九百八十萬。最佳營業員亦係該行嘅何能儉，有二百七十萬數。承造一手樓最出色嘅係沙田大埔樓花組梁漢昇，營業額六百八十萬。新人獎得主係入行只得一年嘅深井麗都分行黃錦姬。
班董事級人馬噚日就搞保齡球賽輕鬆吓，難得咁高興，在場嘅傳媒亦加入。結果由黎董（黎偉強）技壓全場，以一百二十分勝出。其他高層好似張錦成、布少明同王偉榮都玩個不亦樂乎。
柴灣杏花邨因環境清靜同空氣好，唔少外國回流人士都鍾意住呢度，美聯物業杏花邨分行經理吳鋒綬話，一名移民加拿大多年嘅港人，有意喺香港買樓畀父母回港定居，透過電郵，指定要杏花邨，於是將有關資料同相片e畀佢，趁佢返港小住時，帶佢睇樓同完成交易。
結果個客買咗十座低層三室，面積559呎，成交價171萬，呎價3059蚊，高市價約7%，個單位兩年前翻新過，𠵱家都重新淨，又送埋電器，唔使點裝修就可以入住！
九肚山寶柏苑一間拆到爛晒嘅大屋，近日門口有張橫額寫上攻擊性字句，江湖傳聞同追裝修費有關。據聞個業主係廠家，今年初買咗間屋，早排開始裝修，點知拆晒外牆就停工，過咗幾日就出現呢張觸目嘅橫額。
寶柏苑話晒係豪宅，竟然出現單咁嘢，究竟誰是誰非，睇怕要上到法庭至有定案。不過，隔離左右嘅住客，日日夜夜對住間爛屋，就只可歎聲無奈。
蘭西
電郵地址：