在最新一輯可口可樂廣告中，飾演兩位充滿好奇心的後生仔，廣告出街後即時惹人議論紛紛。在旺角信和中心賣明星相的阿儀話：「兩個人未正式出道前，已經有不少妹妹仔嚟搵佢哋啲相，個飲品廣告出街後，賣相數目即刻上升。下年出埋碟，肯定人氣急升。」
信和中心多間賣明星相的舖頭，是看明星流行程度的最佳指標。
教舞編舞多年的RicoTsoi：「新嘅番茄舞同ParaPara一樣，因為簡單易學，所以只屬於興一陣嘅Trendy嘢，唔似HipHop由20年前興到𠵱家。但當小學生都着晒闊袍大袖，代表HipHop已經Hit到殘，需要加入新元素，要玩Mix&Match。好似BritneySpears、JenniferLopez就將HipHop同Jazz混合，蕭亞軒喺香港開Concert都加入Madonna同SpanishStyle，陳小春喺嚟緊嘅Concert更加用咗多個唔同Style嘅排舞導師，Mix&Match會係舞蹈最新氣候。」
蒲精Jackie縱橫酒吧夜場多年，佢畀貼士大家，話開張個多月嘅中環Dragon-i酒吧，將會愈嚟愈旺，因為老闆係城中名人楊其龍，特別多明星、名模、名人走去幫襯，成日見報，有免費宣傳，梗係迅速成為蒲友們嘅新蒲點啦。
經營酒吧十年、StopPub負責人Kenny：「我估計明年酒吧會較旺，因為Disco的熱潮已過，警察又經常查牌令客人掃興，最終這批客人會轉移到酒吧。而靠拳手猜枚留客的年代已過，每個月推出不同活動先有新鮮感。而我哋喺新一年都會為模特兒公司、導演會等提供特別優惠。模特兒想被導演揀中，或導演想揀蟀都有，就靠佢哋嘅連鎖動力提高生意額。」
私房CafePocoAngelo負責人Angela：「最近，銅鑼灣出現咗好多後生仔女開嘅樓上Cafe，佢哋有啲用貓陪客，有啲Sell包場、Sell特色環境，不過因為鬥得劇烈，有啲私房Cafe為咗留客，無酒牌都偷偷賣酒！但亦有幾間玩咗半年已經執笠，所以一定要有特色至可以留低，我哋都新增特惠時間免費睇塔羅服務啦！」
另一個蒲精Ivan，佢就話最睇好東區蘇豪區鯉景灣，事關嗰度好有Potential，有各種食肆餐廳唔在講，重有無敵大海景，個海濱公園唔單止可以拍拖、釣魚，重有個腳底按摩石春路㖭，都吸引唔少男女老少嚟試玩㗎，想感受吓《獎門人》啲遊戲幾高難度喎！