前晚杜麗莎喺尖沙嘴文化中心音樂廳舉行嘅《港樂．杜麗莎DIVA》音樂會，到場嘅嘉賓除咗有葉麗儀同老公之外，特首夫人董趙洪娉同埋律政司司長梁愛詩亦一齊去捧場，記者問董太係咪杜麗莎嘅fans，佢話：「我好鍾意佢，叫佢唔好返加拿大啦！」
問董太會唔會再睇多次？佢即時拍咗身邊嘅梁愛詩一下，重話：「你得唔得閒？」梁愛詩唔知係咪聽唔到，所以冇答，董太走嗰陣重同記者講：「HappyNewYear！」
杜麗莎前晚全家總動員，佢個大女TeresaVictoria同埋二女Alexias都上台伴舞，佢個大女着咗件綠色低胸裝，好鬼搶鏡，臨完場嗰陣，杜麗莎個外籍老公同埋個細女一齊上台獻花畀杜麗莎，杜麗莎好鬼感動，喺台度喊咗幾次。而喺演出完畢之後，重有百幾二百人攞住本場刊搵杜麗莎簽名，記者同杜麗莎講話董太嚟捧場，又話佢個大女好sexy，杜麗莎笑晒口話：「ThankYou！」
孫燕姿最新唱片《未完成……》將會喺日內推出，今次嘅專輯係孫燕姿早排去咗旅行半年時完成嘅，佢嘅第一首主打歌《神奇》重係佢喺倫敦欣賞舞台劇時有感而發嘅作品，首歌充滿濃濃嘅印度風情。孫燕姿為咗拍首歌嘅MV時能夠表達印度風味，除咗同MV男角以印度look示人外，重即興以手部動作表達歌曲旋律。
齊秦大前日喺上海發生車禍，當日齊秦是到上海拍攝廣告，在往市區途中因為前面架私家車突然停車，令到齊秦要緊急煞掣，導致兩車相撞，齊秦嘅左眼即時遭殃，眼皮上方被損，齊秦即刻到上海浦東仁濟醫院縫五針後，大前晚。
任賢齊因為聽覺受損影響工作，推咗幾部賀歲片約，小齊日前嚟香港出席前晚新城頒獎禮，佢話𠵱家要隨身攜帶耳塞，以防去到嘈吵嘅地方，令病情惡化，小齊話：「醫生話我個病唔會好，只可以食藥減輕病情，呢個病係後天造成，𠵱家去到好嘈嘅地方，耳仔都會好痛㗎。」
日前大馬有記者喺當地嘅茶原餐廳做有關飲食嘅訪問，點知撞到香港藝人沈威，沈威以為啲記者影佢，一路喊住要打人哋，搞到成間餐廳啲人都俾佢嚇親，但沈威又唔聽人哋嘅解釋，喺餐廳度鬧唔停，重不時企起身作狀要打人，後來佢喺朋友好言勸喻之下，先肯罷休。
上個禮拜聖誕節，無綫周一至周五嘅平均收視均下跌，《齊天大聖孫悟空》大結局篇平均收視只得三十點，約有一百九十七萬人收看，比起再上一周下跌一點，相反由薛家燕主演嘅《皆大歡喜》周六大結局，平均收視三十二點，約有二百一十一萬人收看，比起再上一周同時段多咗一百零五萬觀眾。