呢排我大口羅拉見到松浦亞彌、後藤真希同藤本美貴頻頻一齊拍寫真，無他嘅，三姊妹嘅共通點除咗係Morning娘之父Tsunku力捧嘅青春偶像之外，佢哋原來一樣好鍾意貓貓狗狗呢啲小動物，簡直當正佢哋係公餘時候嘅最佳伴侶。
松浦亞彌雖然好忙，一邊要灌錄新歌，另一邊又要籌備明年二月演出嘅舞台劇《草原之人》，但佢仍然會經常帶埋隻對眼好似佢咁精靈嘅花貓一齊四圍去，一有時間就同隻貓捉吓迷藏減吓壓。
至於後藤真希，早排拍完電影《狗仔Dun物語》之後，佢對狗仔阿Dun簡直係一見鍾情，當正係自己個仔一樣，成日將阿Dun抱喺胸前，重同狗仔鼻對鼻嘴對嘴，好鬼親密。
而藤本美貴亦唔執輸，佢養咗一隻鬈毛狗，得閒就會拖佢出街散步，由於𠵱家天氣比較凍，所以美貴都會同隻狗仔着番件冷衫先出街，講到愛心同細心，自然係佢贏晒啦！