兩位有心人何先生與阿Jane，早前分別「義不容辭」響應捐贈骨髓，為素未謀面的非血緣癌病患者重燃生命曙光；對於刻下有二百多名血癌病人急待脗合的骨髓以延續寶貴生命，兩人以過來人身份分享其救人的喜悅，並呼籲各界人士參與下月四日及五日舉行的骨髓驗血行動。
五十歲的何先生，十一年前參加骨髓驗血行動，三年前獲安排捐贈骨髓予急待移植脗合骨髓以保命的血癌病人。他細說﹕「我九一年響應『救救血癌病童小哥頓』行動，同太太一齊去驗血，希望有緣幫到呢位小朋友；直至九九年，我收到香港骨髓捐贈基金通知，去接受進一步身體檢查同驗血，因為有血癌病人同我嘅骨髓脗合。當時我第一個感覺係終於可以幫到人，真好！」
健談的何先生續稱：「我以前從未試過全身麻醉，所以到移植骨髓嗰日，心情有啲緊張，加上可以親眼見到啲手術儀器，覺得好特別。」
在旁一直伴着丈夫接受訪問的何太，向記者坦言﹕「起初我心情幾矛盾，一方面開心丈夫能夠幫到人，另方面擔心可能有意外，例如進行全身麻醉嗰陣發生醫療失誤事件。結果一切平安，丈夫捐咗骨髓之後身體依然健康，大家自然開心又放心。」
何先生從事五金製造業，擁有幸福家庭，三名子女現年分別十六、十三及五歲。他由衷表示：「我決定捐骨髓，有太太嘅支持好重要；當時大女得十三歲，亦明白同支持我捐骨髓。𠵱家我身體好好，重肥咗，證明捐骨髓完全唔會影響捐贈者嘅健康，大家唔需要擔心。」何先生早年開始每隔三、四個月便前往紅十字會捐血，多年來共捐血二十七次，其熱心救人的精神令人欽佩。
另一位骨髓捐贈者阿Jane，三十多歲，任職電視節目編導。她憶述﹕「一年幾前當我知道自己嘅骨髓同一個非血緣癌症病人脗合嗰陣，心情又緊張又開心，因為呢個機會只得五千分之一。跟住我為咗唔知點樣講畀父母知我會捐骨髓，有段時間好擔心。」
阿Jane說，幸好有一位朋友主動及耐心向她父母解釋情況，助兩老減少疑慮；而阿Jane捐贈骨髓後一切如常，更令雙親放下心頭大石。「父母以為捐骨髓有危險，但當我事後平平安安返屋企，𠵱家又健健康康，佢哋自然放心，阿媽重對我講：『你做咗件偉大嘅事喇！』」阿Jane欣然表示。
暖流熱線
電話:29908688
傳真:23702192
電郵:
網址：