鄭裕玲（嘟嘟）前晚去港台接受《男人之家》節目訪問，見佢塊面紅卜卜咁，記得嘟嘟以前做過果酸換膚，做完後塊面都係咁，唔通佢又再換膚？不過嘟嘟就話：「我晏晝去咗學電單車，大風得滯吹到咁。」
不過馮仁昭就收到風，知道嘟嘟早排去咗換膚，重洗埋腸㖭！其實趙世光太太何琍琍同林青霞都曾經換過膚，都唔係乜嘢大事啫！
嘟嘟前晚心情好靚，大講感情事，佢早前同呂方去泰國度假，呂方重形容此行係honeymoon，但嘟嘟話：「唔係呀。唉！我都唔渴望結婚，亦唔想生細路，我自己知乜嘢先適合自己，𠵱家係最開心嘅。」
嘟嘟又話早幾日同呂方拍拖十周年，問佢有冇信心去到二十周年，嘟嘟話：「初初都冇諗住會十年啦，無風無浪咁就過。香港女仔俾人寵壞晒，好似公主皇后咁，我就好理性同包容，亦會包容人哋嘅缺點。」
葉璇噚日同陳鍵鋒喺屯門市中心出席活動，重合作跳芬蘭民族舞，非常合拍。
葉璇話加入無綫三年，今年終於有機會做大騷司儀，同埋農曆年首次有假放，可以返內地拍廣告搵真銀。
至於同佢傳過緋聞嘅陳浩民被指同佘詩曼拍拖，葉璇話：「我要幫佢保留私隱，係都唔話畀你哋聽啦。」
金馬影后李心潔前日喺台灣西門町為台灣偶像劇《沒完沒了的夏天》舉行握手會。
李心潔喺劇入面飾演純樸嘅鄉村少女，重會同電台節目主持人發展愛情。前日有成千個影迷出席握手會，而李心潔就即場唱咗兩首歌答謝到場嘅fans。
章小蕙同鍾鎮濤（阿B）雖然離咗婚好耐，但依然有人改唔到口，重叫佢做B嫂。
馮仁昭記得章小蕙同傳媒講過，佢已經唔係阿B嘅太太，唔鍾意人哋再叫佢做B嫂，但噚日凌晨三點幾，章小蕙同朋友喺跑馬地出現。
有記者口快快叫佢B嫂，佢唔單止應對方，而且重好開心咁跳跳紮上咗車，女人真係反覆。
許志安噚日喺尖沙嘴擔任商台節目嘉賓，安仔好似有備而戰咁，知道記者實會問鄭秀文（Sammi）同古天樂嘅緋聞。安仔一開聲就問記者係唔係講音樂，記者梗係唔理佢，照問佢對Sammi緋聞嘅睇法？安仔話：「點睇？用眼睇囉！我有時間都聽歌啦，唔好嘥錢買呢啲雜誌。」