香港地方細，好多愛玩遙控模型的朋友都無適合的場地可以玩餐飽。就好似遙控車發燒友阿Dick，每逢星期六及星期日，都會拋低女朋友，山長水遠去石岩湖玩遙控車。聽佢講，呢個場雖然開咗唔夠兩個月，但已經吸引咗一批香港嘅遙控車迷畀幾千蚊會員費入會。連一向奄尖的香港人都跑上去玩，對個場更讚不絕口，究竟個場有乜特別，有興趣的朋友，一於跟阿Dick去睇睇！
記者：歐嘉荃 攝影：林監琛、Manny
ImageGirl：Marcella、Vicki
阿Dick所講嘅遙控模型場，位於石岩湖度假村內，佔地約有48,000平方米，主要分為三個部份，分別係平路車場、越野車場和飛機場。而一向自命奄尖的車迷阿Dick就極力推介越野車場。「試玩後覺得超級好玩，跑道每次行嘅感覺都唔同，好似落完雨後嘅濕泥同平日嘅乾泥，兩者感覺好唔同，要控制住架車唔好俾泥啜住，又要飛個大急彎，的確較平路刺激兼具挑戰性，每個星期我都會約埋班Friends嚟玩。」
越野車場夠晒精采，不過呢度個飛機場亦都唔輸蝕，短短兩個月就已經有20位熟客仔，當中不乏港客及一些深圳本地人專程嚟放飛機，每逢星期六及星期日，場內起碼有十幾二十個飛機發燒友，邊玩邊表演花式，即使好似我咁冇份玩，有得睇都一樣咁開心。而飛機場分兩部份，分別係飛機場及直升機場，完完全全滿足到兩班唔同嘅客仔。
好似我咁連遙控器都唔識用，要放飛機唔墜機就真係出奇。所以呢度有專為初哥而設嘅租機同學習班，大家只需付出?80，便可租架滑翔機玩之外，重有教練單對單咁教玩飛機，教你飛行技巧、風向對飛機的影響等基本飛行知識，的確夠晒體貼。
訓練班收費
飛行及駕駛學習：星期一至五：?80/小時；星期六、日：?100/小時
好似我咁唔想買飛機玩嘅人，可以租飛機，呢個佔地差不多100平方呎嘅停機坪，全部機都係出租嘅，有適合低技巧人士玩嘅滑翔機，又有專業人士玩嘅3A機，質素唔差，好似我咁貪靚嘅人，重可以揀架姣姣哋嘅紫紅色機，飛上天空特別搶眼。不過每個鐘要成?100租金，的確幾揦脷。
租機/車收費：
遙控飛機
星期一至五：?100/小時
星期六、日：?120/小時（包括專業教練教授初級飛行技術）
遙控車
星期一至五：?80/小時
星期六、日：?100/小時（包括專業教練教授初級駕駛技術）
喺俱樂部嘅主樓設有飛機庫，各位想玩飛機嘅香港人就唔使每次都將飛機運嚟運去，只要畀年費?300就可以放一架飛機喺公眾飛機庫入面，若果想自己包房的話，亦可以每月畀?150租金租番間獨立房。
收費表：
單次：飛機?120/日
車?50/日
會員：飛機?3,000/年
車?1,800/年
＊無限次免費任玩
深圳市逆風遙控模型俱樂部
地址：深圳石岩湖溫泉渡假村
電話：（86）75527164488
營業時間：24小時