隨着歲月流逝，唔單止面上的皺紋愈來愈密，就算對咗一個年頭的月曆都要接受虛耗淨盡的命運。既然要陪足你未來365日，咁就梗係要揀個自己鍾意的。最新2003年版月曆及記事簿早已面世，當中以心臟病患者不宜使用的超性感水着偶像月曆尤其渴市，重有備受妹妹仔一致追捧的名氣記事簿，款款數量有限，要買就要把握最後時機。
記者：尹珊珊 攝影：伍慶泉
逢星期一至四刊出
$120(宇宙船)
人紅始終有佢嘅道理，多得日本現今最紅的水着偶像Megumi落力演繹，七情上面擺出多個性感pose，令呢個水着月曆的噴血指數到達最高點，男Fans亦不得不乖乖畀錢，帶偶像返屋企朝夕相對，不過提醒你呢個Megumi月曆屬搶手貨，現時數量尚有幾個，要買就唔好考慮。
$120(宇宙船)
以女性角度來睇，個人認為藤本綾應該係樣子最甜美、身材最平均的水着偶像，至少無小池榮子咁肉騰騰，而且造型變化較多，着番件性感睡衣同bratop撐吓場，無齋着泳衣咁鬼悶，縱使人氣唔太高，但都買得過。
$120(宇宙船)
風頭俾Megumi蓋過了的小池榮子，畢竟曾經都係水着女王，點都有番兩度散手，2003年版月曆下下出動細幾個碼的比堅尼泳衣，驕人身材原形畢露，縱使攝影技術稍遜兼夾背景簡陋，但相信醉翁之意不在酒，擁躉們都不以為然。
$120(宇宙船)
日本現時最當時得令的少男殺手，走傳統美少女路線的松浦亞彌，2003年月曆繼續大賣其俏皮、活潑、可愛形象，最特別係每一頁都有好幾個松浦亞彌的化身出現，感覺上都幾抵睇，在眾多造型之中，最性感都係得件露肩裝，不過對甚少露肉的松浦亞彌來講，算係畀Fans有少少意外驚喜。
$120(宇宙船)
店員甲極力推介、猛話成班Friend都讚好的田中麗奈月曆，的確影到佢相當靚女，而且愈大就愈有女人味，但其實如果睇真點，就會發覺布景同造型都幾慳水慳力，不過齋賣田中麗奈的靚樣，已令少男Fans(如店員甲等)深深迷倒。
$360(KSTORE)
大熱品牌HystericGlamour出品，彩色繽紛奪目，裏裏外外印滿奶嘴BB標記，完全捉正Fans的虛榮心態，幾乎每個潮流型女都想擁有。
$260(Cactus)
立體膠質皮套乍看好似塊放大版Lego，最正係每張內頁均印有Lego公仔嘜頭，並送有Lego貼紙一大張，絕對能滿足Fans們的慾望，再加上Lego精品本身極度渴市，故每隻色只餘少量，有買趁手。
牛仔布記事簿感覺較為中性，又有一份隨意的味道，而且質料襟污糟，無論係立體皮扣款或Graffiti款皆男女合用，內涵方面有齊年曆、每日備忘錄、空白頁、單行頁、放雜物的膠套及迷你剪刀等，樣靚之餘夠晒實用。
宇宙船
地址：太子聯合廣場地下G33舖
電話：28828482
Cactus
地址：旺角彌敦道628號瓊華中心202號舖
電話：27712789
KSTORE
地址：旺角彌敦道628號瓊華中心222號舖
電話：27812760
ad:lib
地址：銅鑼灣東角道24-26號東角馬尺108號舖
電話：28810627