無番幾件大事又點有資格做回顧，何況今年通訊界的而且確熱鬧非常，就算你唔睇IT版留意新產品，同通訊有關的大事件亦上埋港聞兼大大版，唔到你不聞不問。咁又有邊件事大到足夠上頭位？今日就由街坊，以及翻閱四大叠5吋厚資料後的小記，齊齊數一數本年度的通訊十大，上頭位嘅是相信你同我都領教過的電話大癱瘓。
記者：招佩珊 攝影：周旭文（街訪）
第一位
上得港聞兼有大半版絕非碎料，何況全港用家身受其害，難怪眾街坊將癱瘓事件擺上首位。案發時間是9月11日中午12時至下午1時，受害人是你同我，天文台宣布即將改掛8號風球，全港電話打極打唔通，慘啲講句有意外都搵唔到救兵。電訊管理局表示由於一小時內全港流動電話使用量有1,400萬次，以致網絡容量無法負荷出現大擠塞。又難怪，平日最高每小時都只不過是400萬，當日高出3倍有多，唔塞就假，下次打風唔使返工，約開枱唱K呢類電話就唔好打住，留番Quota畀急Call用。
第二位
無計，又是切身問題，用開飛線同留言一向免費包送，自5月開始各台好似夾定咁齊齊唔送飛線，留言信箱就只惠及高用量客，要用就自掏腰包畀多三、四十，唔用飛線則相對畀較多通話費，除非就住傾或索性唔用，否則點都侷住畀較多月費。
第三位
01年10月宣布合併，半年後印上SonyEricsson嘜頭的首部新機終於登場。拍上Sony的愛記機果然沾上幾分Sony產品的強項：夠形格，唔再一嚿炭的T68i更是當時市面上首部MMS手機，加埋個Cam仔玩影相，確實男女齊齊冧。
第四位
又上港聞，當然又是投訴，多次以出位廣告引人注目的SUNDAY，今年又中，以電鑽鑽甩頭的廣告再度成功上位，但相對去年共有5個廣告均有投訴的紀錄，總算留手。
第五位
9月及11月，短短3個月內分別於台灣及挪威發生同是3310的自焚事件，挪威發生的相信是同用非原廠電有關，但台灣的則是用原廠電，但自焚原因未明。雖則並非於本地發生，但香港用家幾近人人一部手機，點都會留意，唔怕燒到埋身咩！
其餘五大不分先後
去年預計今年彩芒機會接踵而來，果然密密出籠兼成大氣候，無彩不成，而且更由256色逐步跳級，4,096去到近期最靚的65,000色，到頂未？來年重有十萬幾色的彩芒，不過個芒咁細，肉眼睇又未必分得清。
唔用唔代表唔興，況且近兩個月亦多了MMS手機上市，之不過收費貴，Send個MMS動輒要$3甚至$18，早前就有位用家買部影相手機，Send了近百張相，到月尾埋單就要畀成千蚊。MMS剛剛於本月中才打通六台，怕且要等到出年收費下調先會吸引較大班用家。
是小記的親身體驗，日日拎住部勁影勁Send，就算大嚿亦在所不計，全因兩個字：「好玩！」家陣行貨大概三千八左右，相對淨機價成五、六千的其他品牌，抵玩！
00及02年連續兩屆亞洲電信展均於香港舉行，個人意見覺得今年無上一屆咁精采，展覽商數目較少，幾大手機巨頭無出現，上屆通場走的靚女ShowGirl，兼任拎的各款精緻紀念品，今年明顯唔多覺，尤其是當小記要着筆今屆展覽的現場花絮時非常頭痛，無乜嘢寫！
是摩記近年破格之作，黑底反白字加360°旋轉揭蓋，無用開摩記機的用家亦紛紛中毒。兩電兩叉送耳筒、表、面環的特別版，摩記當初只不過定價約$5,000，點知在貨量有限的情況下炒到$8,000，是近年罕有的高炒行貨機。