𠵱家係買家嘅天下，業主為求賣出單位，唔單止價錢要一減再減，重要就得個客㖭，唔係個客行咗去買第二間，咁自已嘅單位真係又要有排等至賣得出嘞。
好似九龍灣麗晶花園有位業主，一聽到有客還價，嗱嗱臨由內地趕返嚟簽約，皇天不負有心人，成功賣出個單位。
中原地產德福分行經理陳鳳霞對蘭西講，個單位係麗晶花園十二座低層B室，面積470呎。業主喺內地工作，諗住移民，所以喺一個月前放售，自由市場開價90萬，但就冇下文，惟有減到77萬試吓。
早前終於有個客睇樓，但後嚟去咗幾日旅行，返港後安排個女睇多次，還價73.8萬，業主喺內地聽到有人肯買，返緊工都嗱嗱臨趕返香港，兩個鐘頭內簽約作實成交，呎價1570蚊，個單位早兩年用咗近八萬裝修，所以個價都算幾筍。業主自住10年平手離場。
市道不景，發展商賣樓提供優惠同付款方法畀買家揀，但未必啱心水，所以要聽吓買家心聲。
嘉華地產嘅馬鞍山嘉華星濤灣，早排加咗項三十六個月一同二按免息供付款方法，嘉華地產高級物業經理陳玉成講，原來係順應買家要求而設嘅。
陳玉成重話，若果買家喺嗰段時間咁唔好彩失業，都唔使為供樓徬徨，可以慢慢搵過份工。嘉華星濤灣預計入伙日期為後年4月。
九龍倉總部近排突然多咗好多日本人出入，蘭西得悉原來佢哋係幫九龍倉個尖沙嘴摩天輪做設計工作嘅，既然咁難得可能係香港地標之一嘅摩天輪，九龍倉梗係要搞到最好啦，重要求款式獨特，都幾考功夫㗎，聽講會整番個標誌，等啲人一講起或睇見就諗起摩天輪同九龍倉。估計05年初可以啟用。
九龍區樓市一向以紅磡黃埔花園造價作參考，近年就梗係加入埋海逸豪園啦，今個月到𠵱家，海逸豪園總共有十二單買賣，聽講話利嘉閣海逸豪園第二分行包辦咗一半。
呢個分行共有八名同事，最高領導人林穗華，入行七年，喺黃埔區做咗五年幾，所以同啲業主好熟絡，啱啱過去嘅聖誕節，有啲業主搞派對都請埋佢。
聽講成組人都好勤力，由上晝九點半做到晚刻差唔多十點至收工，今個月到𠵱家，就做咗近六十萬數，好似係該區各同行之冠。
中原同利嘉閣由禮拜三起，削減新入職見習代理底薪，取消call機同牌費津貼，重將獎金制嘅金額改由各區主管自行釐定。
不過，美聯就話之前冇打消耗戰，所以一切維持不變，總之一句講晒「多勞多得」。
美聯咁做重有一個原因，係佢哋認為明年樓市會平穩發展，成交量可增加25%，即係多咗賺錢機會。美聯執行董事張錦成重話，公司現有三千員工，明年會再請多一成人手㖭。
蘭西
電郵地址：