恒指上周五收9445，全周下挫183點，美股又再唔生性，港股未跌夠，就算間中有技術性反彈，都好難叻得去邊。短期炒輪搵食，非常艱難，做淡嗰便有較大贏面，不過亦唔適宜坐盤坐得太耐，Put輪同Call輪一樣，溢價會隨住時間消逝而縮窄。
恒指Put輪9444同9448，臨近末日，1月29日夠鐘，短線有得睇。9444現價20仙，溢價0.5%，槓桿率15.7倍；9448現價11仙，溢價1.3%，槓桿率34.4倍。兩隻輪都係買賣活躍，買貨唔難平倉亦易，9444接近平水，對恒指變化會比較跟得貼一啲。
恒指Put輪9556同9587，亦都有大成交，啱短炒，時間稍長，溢價自然高些少。9556明年（過多1日半變今年）3月夠鐘，現價15.4仙，溢價4.9%，槓桿率15.3倍；9587明年5月夠鐘，現價20.3仙，溢價4.8%，槓桿率11.6倍。
恒地Put輪9385，1月22日夠鐘，按盤價47.5仙，有負溢價5.1%，槓桿率5倍，好抵買。平水計，隻輪值59仙，隻輪低於理論價近兩成。點解會咁？就係因為連續31日冇成交，買家價冇乜點跟正股下跌而嘜高。藍籌備兌證實行莊家制，有啲輪一樣成交一片空白。
章盛