人紅多親戚，片旺同樣多人認威攞彩。有強積金管理局要員問八方睇咗華仔同偉仔套《無間道》未？要員笑到見牙唔見眼話：「裏面有講強積金㗎！」
《無間道》走勢凌厲，票房同口碑一樣掂，八方又點會唔拿拿臨走去睇？要員提起強積金，八方馬上知道佢老兄講緊套戲邊部份。不過，如果話呢段戲講強積金，似乎有啲牽強。
各位記唔記得講緊邊段戲呀？
係嘞，就係保鑣嗰一段。話說黑社會老大曾志偉要徹查誰是警方派來的卧底，於是下令眾手下填寫一份個人履歷交畀佢，以便佢派到警隊的卧底劉德華可核對電腦紀錄。
眾蠱惑仔揸住支筆有千斤重，錯字連篇，「保鑣」寫錯做「保標」，諸如此類。大家不明白大佬點解要自己填履歷，有人懶聰明講一句：「梗係要報強積金嘞！」眾人和應：「係呀！係呀！」
所謂講強積金，就係呢一句咁大把。
但強積金管理局都算認真。知道《無間道》有呢句對白，就派人逐間逐間戲院去睇吓觀眾反應，緊張程度拍得住導演劉偉強同麥兆輝。結果？要員告訴八方，觀眾聽到戲中人提起強積金，反應好好，一句噓聲都聽唔到。要員笑笑口話呢個結果顯示強積金都幾深入民心。吓，咁都得？
傳真︰2623-9278
電郵︰